د پژواک خدمتونه

د انځورونو څانګه

د پيغام له لارې خبري خدمتونه

د دغو خدمتونو د وړاندې کولو موخه دا ده ، تر څو د ګرځنده ټيلېفونونو له لارې په دوامداره توګه خلک خبرونو ته لاسرسى ومومي او هيلې يې ترسره شي. پژواک غواړي د خبرونو خپرولو په برخه کې خپل مسلکي مهارتونه او تجربې له ټيلېفوني شبکو سره شريکې کړي او له دې لارې وکړای شي ډېرو برخه والو ته په اغېزمنه بڼه خپل خدمتونه ورسوي.

د ګډون وړانديز
د انګليسي خبرونو لپاره ګډون: Send 83 to 824
د دري خبرونو لپاره ګډون: Send 84 to 824
د پښتو خبرونو لپاره ګډون: Send 85 to 824

د ټاکنو خبري پوښښ

د کانونو په اړه ځانګړې پاڼه

د رسنيزو خبرتياوو خدمتونه

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د کوچيانو د ستونزو د حل لپاره د مرستو غوښتنه وشوه

د کوچيانو د ستونزو د حل لپاره د مرستو غوښتنه وشوه

Mar 31, 2011 - 18:08

کابل (پژواک ١١ ورى ٩٠): د کوچيانو رياست له يو شمېر دولتي او غير دولتي ادارو وغوښتل، چې د کوچيانو د شته ستونزو د حل په موخه اړينې مرستې وکړې.

د کوچيانو د چارو د سمون خپلواک رياست مشر عزت الله احمدزي، ياده غوښتنه په هغه ورکشاپ کې وکړه، چې نن د يو شمېر دولتي چارواکيو او ځينو بهرنيو سفارتونو او موسسو د استازيو په ګډون په کابل کې جوړه شوې وه.

په دې ورکشاپ کې په کابل کې د ايټاليا سفارت، د ماشومانو لپاره د ملګرو ملتونو وجهي صندوق (يونسف)، د امريکا نړيوالې پراختيايي ادارې او د يو شمېر نورو بهرنيو موسسواو سفارتونو استازو ګډون درلود.

د احمدزى د معلوماتو له مخې، په تېرو پنځو کلونو کې د هېواد په کچه د اړونده وزارتو په مرسته ١٦٢ ثابت او ګرځنده ښوونځي او ٥٠٠  څاګانې د کوچيانو لپاره جوړې شوې دي.

دغه راز دى وايي، چې په دې موده کې په درېيو ولايتونو کې ثابت او په ٢٤ ولايتونو کې يو يو ګرځنده روغتيايي کلينيک هم د کوچيانو لپاره جوړ شوى دى.

خو هغه وايي، چې دغه کارونه کافي نه دي او کوچيان د زده کړو او روغتيا د مرکزونو، څړځايونو، حيواني کلينيکونو، حيواني خوراکي توکيو او د څښاک د پاکو اوبو له نه شتون او کموالي سره مخ دي.

ده غوښتنه وکړه، چې کوچيانو ته په هر ولايت کې د ليليې په ګډون يوه يوه لېسه، انساني او حيواني ثابت او سيار کلينيکونه جوړ او نجونو او ځوانانو ته يې حرفوي زده کړې ورکړل شي.

په ولسي جرګه کې د کوچيانو قبايلو، بې ځايه شويو او کډوالو د کمېسيون رييس حبيب الرحمن افغان وويل، چې د کوچيانو ستونزو ته هېڅ پاملرنه نه ده شوې.

هغه زياته کړه، چې د تېرو جګرو او وچکاليو له امله د کوچيانو مالدارۍ او څړځايونه له منځه تللي، چې بايد افغان دولت او نړيواله ټولنه د دې ستونزو په اړوند له کوچيانو سره مرسته وکړي.

د کوچيانو د چارو د سمون د خپلواک رياست مشر د معلوماتو له مخې، په دې ورکشاپ کې چې له غرمې وروسته پاى ته ورسېد، د کوچيانو پر ستونزو خبرې وشوې او ګډونوالو د کوچيانو ستونزې له ځان سره وليکلې.

هغه وايي، تمه کېږي چې د يادو ستونزو د حل لپاره مرستې وشي.

خو په ولسي جرګه کې د کوچيانو استازي ملاتره خېل کوچى وايي: ((په دې تېرو پنځو کلونو کې داسې په لسګونه ورکشاپونه ترسره شوي، چې کومه نتيجه يې نه درلوده او مشکلات ليکلي په کاغذونو کې په الماريو کې قيد پاتې شوي دي.))

هغه د نورو معلوماتو له ورکولو پرته وويل، چې د کوچيانو څړځايونه چې شرعي قبالې او فرمانونه هم په لاس کې لري، د زورواکو له خوا غصب شوي دي.

دورستیو خبرونو، فیچرونو ، مرکو ، ویډیو او انځورونو ته دلاسرسي په موخه دپژواک خبري آژانس مبایل اپلکیشن په خپل ګرځنده ټیلفون کې ډانلوډ کړئ.

اعلانونه

Advertisement