جلال اباد (پژواک ٦ غويى ٩٠): د جلال اباد ښار سوېل ته په رېنګ روډ کې د اور لګېدنې په يوه پېښه کې د بهرنيو ځواکونو يو ټانکر او يو ټانک وسوځېدل.

دغه پېښه نن د غويي په ٦مه، له غرمې وروسته په شاوخوا درېيو بجو پر رېنګ روډ د شمشاد مېنې په ساحه کې رامنځته شوه.

د پېښې يوه عيني شاهد ذبيح الله پژواک خبري اژانس ته وويل، چې د بهرنيو ځواکونو د تېلو په يوه ټانکر کې له چاودنې وروسته اور ولګېد.

د هغه په وينا، له دې ټانکر شاته روان د ناټو ځواکونو يو ټانک هم اور واخيست او په کې چاودنه هم وشوه.

دى وايي، چې سيمه بهرنيو ځواکونو کلابنده کړه، خو له مرګ ژوبله يې خبر نه درلود.

د ننګرهار د والي وياند احمدضياء عبدالزي پژواک اژانس ته همدومره وويل، چې په ياده سيمه کې يوه ټانکر اور اخيستى و، چې ځاني زيان يې نه درلود.  

په ختيځو ولايتونو کې د ناټو ځواکونو مطبوعاتي دفتر پژواک ته وويل، چې د دوى موټر د تخنيکي عوارضو له امله اور اخيستى او چا ته په کې د سر زيان نه دى اوښتى.