د پژواک خدمتونه

د انځورونو څانګه

د پيغام له لارې خبري خدمتونه

د دغو خدمتونو د وړاندې کولو موخه دا ده ، تر څو د ګرځنده ټيلېفونونو له لارې په دوامداره توګه خلک خبرونو ته لاسرسى ومومي او هيلې يې ترسره شي. پژواک غواړي د خبرونو خپرولو په برخه کې خپل مسلکي مهارتونه او تجربې له ټيلېفوني شبکو سره شريکې کړي او له دې لارې وکړای شي ډېرو برخه والو ته په اغېزمنه بڼه خپل خدمتونه ورسوي.

د ګډون وړانديز
د انګليسي خبرونو لپاره ګډون: Send 83 to 824
د دري خبرونو لپاره ګډون: Send 84 to 824
د پښتو خبرونو لپاره ګډون: Send 85 to 824

د ټاکنو خبري پوښښ

د کانونو په اړه ځانګړې پاڼه

د رسنيزو خبرتياوو خدمتونه

د پژواک د سوداګريزو اعلانونو خدمتونه

دګرځنده ټيلېفون اپلکېشېن

Daily Newsletter

Language
Sending Time (GMT / Kabul time)

يوه ځوان افغان کمپيوټر پوه ( افغان مسنجر ) جوړ کړ

يوه ځوان افغان کمپيوټر پوه ( افغان مسنجر ) جوړ کړ

Sep 13, 2011 - 16:50

کابل ( پژواک  ٢٢وږى  ٩٠ ) : يو افغان ځوان حافظ نصرت الله البي وايي چې د "افغان مسنجر" په نوم يې د افغانانو لپاره داسې سافت ويير جوړ کړى،چې له ياهو او نورو مسنجرونو څخه ډېر پرمخ تللى دى.

 ٢٦کلن نصرت الله البي له پژواک خبري اژانس سره په ځانګړې مرکه  کې د خپلې دې بريا د اعلانولو پر مهال وويل چې د افغان مسنجر جوړولو ته يې  ځکه اقدام وکړ، څو افغانان وکولى شي په ټوله نړۍ کې له خپل مسنجر څخه ګټه واخلي.

 دى وايي ، چې افغان مسنجر به د ياهو او نورو مسنجرونو په پرتله ډېرې اسانتياوې ولري.

 البي وايي چې  افغان مسنجر د پر ليکه زده کړو لپاره د " آنلاين تيچر " په نوم ځانګړى سيستم  لري او هغه افغانان چې نه شي کولى پوهنتونونو او يا د زده کړو نورو مرکزونو ته لاړ شي ، د افغان مسنجر له دې  پروګرام څخه په ګټه اخيستو به په ښه ډول زده کړو ته لاسرسى پيدا کړي .

  البي وايي چې ددې مسنجر بله مهمه برخه د راډيويي خپرونو برخه ده .

 د هغه په وينا، د افغان مسنجر کاروونکي به وکولاى شي د نړۍ د زرګونو راډيوګانو اورېدو ته په واضح ډول لاسرسى ولري.

دى زياتوي : " په افغان مسنجر کې ددې امکان شته ، چې له ګڼو راډيويي خپرونو يوه غوره کړو ، په پروګرامونو خپل انلاين نظر ورکړو ، په ليکلي  ډول ورته د هرې خپرونې او مرکې لپاره پيغام پرېږدو  او دې ته به حاجت نه وي، چې له ټېلېفون نه ګټه واخيستل شي. "

 ده وويل چې په نورو مسنجرونو کې تقريبا  له لسو تر شلو کسانو پورې  کولى شي ويډيو کنفرانس ولري ،  خو افغان مسنجر ددې وړتيا لري ، چې تر سلو زرو کسانو ته د ويډيو کنفرانس اسانتيا برابره کړي .

 هغه زياته کړه : " که دغه مسنجر د کارولو لپاره وړاندې شي ، نو په يوه کال کې به د لسو ميليونو اي ډي ګانو د کارولو ظرفيت ولري. "

  البي وايي ،پوره يقيني دى، چې په جوړ کړي مسنجر يې د هيکرانو زور هم نه رسېږي ، ځکه چې ده يې له جوړولو وړاندې جوړ کړى ډېټابس دهکرانو نړۍ ته استولى و،هغوى ورباندې پوره زور وواهه ، خو څه اثر يې ورباندې ونه کړ.

 هغه وايي چې دى په دې کار سره  ډاډه  شو، چې افغان مسنجر د انټرنټ په نړۍ کې له  نورو مسنجرونو سره نه يواځې  سيالي، بلکې تر هغو ښه کار کولى شي .

 دغه افغان ځوان وايي ، غواړي افغان مسنجر د افغانستان دولت او خلکو ته ډالۍ کړي او که نه ، نو ده کولى شول چې دغه مسنجر د خپلو نورو جوړو کړو سافټ وييرونو په څېر پر بهرنيو يا خصوصي شرکتونو په لوړه بيه وپلوري .

  هغه زياته کړه : "زما اقتصادي وضعيت دومره نه دى ښه، چې  د افغان مسنجر لپاره نور لازم توکي برابر کړم ، که دولت مرسته وکړي او په لوړه کچه د يوه ځانګړي  سرور چې څلورويشت ساعته فعال نټ او د لوړې کچې کمپيوټرونه ولري ، برابر کړي ، نو د ميليونونو کسانو د کارلپاره به چمتو شي ، چې دا کار د يوه شخص لپاره خورا لوړه، خو د دولت لپاره په کمه پانګه سره کېداى شي ."

 ده له نورو افغان کمپيوټر پوهانو او نړيوالې ټکنالوجۍ (  اى  ټي ) له افغان کارکوونکو څخه هم وغوښتل چې له ده سره مرسته وکړي ، څو په ګډه خپل هېواد له ځانګړي افغان مسنجر څخه برخمن کړي .

 البي  د ان ډبليو اې (N W A) په نوم د هغه سافټ ويير يادونه هم وکړه، چې د حسابدارۍ په برخه کې يې جوړ کړى دى او دا مهال يې د صرافۍ په نظام کې ګڼې اسانتياوې رامنځته کړې دي .

 هغه  وويل : " ما يو وخت د حسابدارۍ يا صرافۍ په برخه کې  (Simple Acounting)  سافټ وير رامنځته کړه چې د يوه هېواد پولي واحد يې محاسبه کاوه ، خو کله يې چې شرکتونو او صرافيو هرکلى وکړ، نو زه يې وهڅولم  چې  د ان ، ډبليو ، اې  دويم سافټ ويير جوړ کړم. "

 هغه زياته کړه چې دغه سافټ ويير يې نه يواځې د ١٧٥  هېوادونو پولي واحد  په يوه وخت کې محاسبه کوي، بلکې د صرافيو ، شخصي سوداګريزو شرکتونو ، بانکونو او هټيو ګڼ حسابونه  د دوه ميليونه کاروونکو لخوا  يواځې د مديريت لخوا ورکړل شوي کارونه ترسره کولى شي.

 البي وايي چې دى د همدې سافت ويير د لا عامولو او په دې برخه کې له خلکو سره د مرستې لپاره  له مصر څخه افغانستان ته راغلى دى .

   حافظ نصرت الله البي د  الحاج انجينر محمدرحيم زوى په ١٣٦٤هجري لمريز کال کې د ميدان وردګو ولايت د چک ولسوالۍ د امبوخاک په کلي کې زېږېدلى دى .

 ده  لومړنۍ زده کړې د امبوخاک په ښوونځي کې اود لېسې  د دورې زده کړې يې دګردېز په عبدالحى ګردېزي  لېسه کې  کړې دي .

 هغه په ١٥ کلنۍ کې په ګردېز کې د بلال بن رباح په دارالحفاظ کې قرانکريم حفظ کړى او بيايې لوړې زده کړې په ايران ، ترکيه او ځينو نورو عربي هېوادونو کې دکمپيوټر دداخلي نظام او حسابدارۍ په برخه کې کړې دي .

البي  دا مهال د مصر په عربي جمهوريت کې د کايټو سافت د ډلې منيجر دى او تراوسه يې  په بېلابېلو برخو کې ٨ سافت وييرونه جوړ کړي دي .

 ديادونې وړ ده چې له دې مخکې د اسرار کريمزي په نامه د کونړ ولايت يو ځوان هم د افغان استوزګر په نامه مسنجر جوړ کړى و.

 کريمي وايي چې دا مسنجر د يوې لنډې مودې لپاره په ليکه شوى و، خو دامکاناتو د نه لرلو له امله يې په ليکه پاتې نه شو.

دورستیو خبرونو، فیچرونو ، مرکو ، ویډیو او انځورونو ته دلاسرسي په موخه دپژواک خبري آژانس مبایل اپلکیشن په خپل ګرځنده ټیلفون کې ډانلوډ کړئ.

Advertisement