کابل (پژواک ٣ لړم ٩٠): د ناټو په مشرۍ د ايساف ځواکونو يوه چورلکه په کاپيسا ولايت کې د وسلوالو طالبانو په يوه بريد کې زيانمنه شوې ده.
په کابل کې د ايساف ځواکونو د ګډې قوماندانۍ مطبوعاتي دفتر د لړم په درېيمه پژواک خبري اژانس ته وويل، چې دا پېښه پرون له غرمې وروسته د کاپيسا ولايت د اله ساى په ولسوالۍ کې رامنځته شوې ده.
سرچينې زياته کړې، چې دغه چورلکه سيمې ته د افغان ملي ځواکونو د مرستې لپاره تللې وه، چې د الوتنې پر مهال د وسلوالو طالبانو تر بريد لاندې راغله.
د ايساف په خبرپاڼه کې راغلي، چې له بريد وروسته چورلکه د ايساف په يوه نږدې نظامي اډه کې کښېناسته، خو په چورلکه کې له پلټنې وروسته معلومه شوه، چې د سپکې وسلې دوه مرمۍ پرې لګېدلې دي.
د سرچينې د معلوماتو له مخې، په پېښه کې چاته هېڅ ډول زيان نه دى اوښتى او د دوى تخنيکي عمله د چورلکې د بېرته ترميمولو په هڅه کې ده.
خو وسلوالو طالبانو بيا ادعا کړې، چې ياده چورلکه يې ويشتې او غورځولې ده.
طالب وياند ذبيح الله مجاهد وايي، چې دا چورلکه يې د کاپيسا د تګاب ولسوالۍ په مرکزي سيمه کې ويشتې او لوېدلې ده.
هغه ادعا وکړه، چې په چورلکه کې سپاره د ايساف شاوخوا ٢٠ سرتېري، چې فرانسويان وو، وژل شوي دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن