قلعه نو (پژواک ٢٨ ليندۍ ٩٠): د بادغيس په بالامرغاب ولسوالۍ کې د پوليسو او وسله والو طالبانو تر منځ په نښته کې يو پوليس افسر او دوه طالبان وژل شوي او يو بل طالب ټپي شوى دى.
د بادغيس امنيه قوماندان سمونوال محمدجبار صالح نن (د ليندۍ ٢٨مه) پژواک خبري اژانس ته وويل، چې دغه نښته تېره شپه د بالامرغاب ولسوالۍ په پنيرک سيمه کې رامنځ ته شوه.
د ده په وينا، دغه نښته هغه وخت پيل شوه، چې وسله والو طالبانو د پوليسو پر يوې پوستې بريد وکړ او په کې د پوليسو يو افسر ووژل شو.
صالح زياته کړه، چې په دې نښته کې دوه وسله وال طالبان هم وژل شوي او يو بل ټپي شوى دى.
د سيمې يوه اوسېدونکي سید نورالدین پژواک ته وويل: ((د ډزو غږونه د پوستې له خوا اورېدل کېدل او نږدې شل دقيقې يې دوام درلود.))
هغه زياته کړه، چې سهار وختي مې د يوه پوليس مړى وليد، چې د نورو پوليسو له خوا له سيمې وړل کېده.
وسله والو طالبانو هم د دغې نښتې پخلى کړى دى.
طالب وياند قاري يوسف احمدي دعوه کوي، چې په دې نښته کې درې پوليس وژل شوي او څلور نور ټپي شوي دي.
د ده په وينا، په نښته کې وسله والو طالبانو ته کومه مرګ ژوبله نه ده اوښتې.
دا په داسې حال کې ده، چې شل ورځې وړاندې هم د وسله والو طالبانو په يوه کمين کې په بالا مرغاب ولسوالۍ کې د ملي اردو دوه سرتېري وژل شوي وو.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن