کابل (پژواک١٣مرغومى٩٠): د افغان چارواکو له هڅو سره، سره لا هم په پاکستان کې د افغان سوداګرو د درول شوو توکو ستونزه نه ده هواره شوې.
د پاکستان حکومت ٧٠٠ هغه يخچالي موټر، چې د افغان سوداګرو خوراکي توکي په کې بار دي، له شاوخوا شلو ورځو راهيسې د دغه هېواد په بېلابېلو سيمو کې درولي دي.
د پاکستان پوځي چارواکي وايي، دغه موټر يې ځکه درولي، چې ګواکې په افغانستان کې د ناټو ځواکونو ته اکمالات کوي، خو افغان چارواکي او سوداګر دغه ادعا بې ځايه بولي.
د پاکستان حکومت شاوخوا پنځه اونۍ مخکې وروسته له هغه د دغه هېواد له لارې د ناټو پر اکمالاتو بنديز لګولى، چې د ناټو ځواکونو په يوه هوايي بريد کې ٢٤ پاکستاني سرتېري و وژل شول.
د افغانستان د سوداګرۍ او صنايعو وزير انوارالحق احدي نن په يوه ټيلېفوني مرکه کې پژواک خبري اژانس ته و ويل، چې د افغان سوداګرو د درول شويو توکو د ستونزې د حل په موخه يې تېره ورځ د پاکستان د کورنيو چارو له وزير رحمان ملک سره ټيلېفوني خبرې کړې دي.
د سرچينې په وينا، رحمان ملک ويلي، چې د دې ستونزې د حل لپاره به هڅه وکړي.
د احدي په وينا، د پاکستان د کورنيو چارو د وزير همکارۍ مخکې هم، دې ته ورته د رامنځته شوو ستونزو په حل کې اغېزمنې وې.
هغه په دې اړه، چې د افغان سوداګرو ياده ستونزه به کله حل شي؟ و ويل: ((لږ مشکله ده، څه نه شم ويلى، زموږ هڅې روانې دي، وګورو چې څه کېږي.))
د ده په وينا، په پاکستان کې د افغان سوداګرو له توکو بار درول شوي موټر د (جرمن لوژستيک) په نوم د هغې پاکستانۍ کمپنۍ دي، چې ناټو ته هم اکمالات کوي.
د هغه د څرګندونو له مخې، د پاکستان پوځي چارواکي فکر کوي، چې په يادو ٧٠٠ درول شويو موټرو کې بار شوي توکي به هم د ناټو اړوند وي.
احدي وايي، چې د دې ستونزې د حل لپاره د افغانستان د ولسمشر لومړي مرستيال مارشال محمدقسيم فهيم هم لوى درستيز ته ويلي، چې په دې اړه د پاکستان له پوځي چارواکو سره خبرې وکړي.
دغه راز د افغانستان د سوداګرۍ او صنايعو خونې دويم مرستيال خان جان الکوزى په پاکستان کې د افغان سوداګرو ياده ستونزه جدي بولي او له افغان حکومت څخه يې د حل په موخه د بېړني اقدام غوښتنه کوي.
هغه و ويل، له دې امله چې په دغو توکو کې د افغان سوداګرو ډېره پانګه بنده ده، د ورځې په تېرېدو سره سوداګرو ته د زيان کچه ډېرېږي.
په يادو موټرو کې د افغان سوداګرو د چرګانو غوښې او هګۍ بار دي.
د چرګانو د غوښې او هګيو واردوونکو افغان سوداګرو د ټولنې مرستيال حاجي احمدشاه د مرغومي په لسمه پژواک ته ويلي و، چې په درول شوو موټرو کې د شاوخوا ١٠٠ ميليونه امريکايي ډالرو په ارزښت توکي بار دي.
د سرچينې د څرګندونو له مخې، پر دغو توکو هره ورځ په پاکستان کې تر ٢٥٠زره امريکايي ډالرو جريمه او نور لګښتونه راځي.
د يادونې وړ ده، چې دوه ورځې مخکې يو شمېر افغان سوداګرو ګواښ وکړ، چې که چېرې دې ستونزې ته د حل لار ونه موندل شي، دوى به په افغانستان کې د پاکستاني سوداګرو د موټرو مخه ونيسي.
تېر کال هم په پاکستان کې د افغان سوداګرو په زرګونو کانټينره توکي د ډېر وخت لپاره په کراچۍ بندر کې تم شوي وو، خو بيا د افغان حکومت د هڅو په پايله کې پرېښودل شول.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن