کابل (پژواک ٢٦مرغومى٩٠): د وزیرانو شورا له ازبکستان څخه د برېښنا له پېرودنې او د افغانستان له لارې پاکستان ته د هغې له لېږد سره موافقه وکړه.
د ولسمشر د ويندوى له دفتر څخه د مرغومي په ٢٦مه، پژواک خبري اژانس ته په رالېږل شوې خبرپاڼه کې راغلي، چې د حامد کرزي تر مشرۍ لاندې نن د ولسمشرۍ په ماڼۍ کې د وزیرانو شورا غونډه ترسره شوه.
خبرپاڼې زياته کړې، چې په دې غونډه کې په کابل کې د پاکستان سفارت هغه یادښت وڅېړل شو، چې په هغه کې د ازبکستان له هېواد سره د افغانستان له لارې پاکستان ته د برېښنا د لوړ ولټاژ مزي د غځېدو یادونه شوې وه.
همداراز په دغه يادښت کې د افغانستان له دولت څخه غوښتنه شوې وه، چې افغانستان دې د خپلې خاورې له یوې مناسبې لارې څخه پاکستان ته د برېښنا د دغه مزي له غځېدو سره موافقه وکړي.
خبرپاڼه کاږي، چې د وزیرانو شورا په کابل کې د پاکستان سفارت د يادښت له څېړلو وروسته، په دې موافقه وکړه چې له ازبکستان څخه د پېرودل شوې برېښنا د لوړ ولټاژ مزي دې د افغانستان له لارې پاکستان ته وغځول شي.
سرچينه ليکي، چې په ياده شوې غونډه کې د انرژۍ او اوبو وزارت مستيال غلام فاروق قاضي زاده وويل: ((پاکستان ته د دغه مزي د غځېدو تګلوری او شرایط به د افغانستان او پاکستان د تخنیکي ډلو له خبرو وروسته مشخص شي.))
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن