اسعد اباد (پژواک ١٨ سلواغه ٩٠): د کونړ امنيه قوماندانۍ لخوا د ډاياک پروګرام ته ٤٦ ميله سپکې او درنې وسلې وسپارل شوې.
د کونړ امنيه قوماندان مل پاسوال عوض محمد نذيري د دغو وسلو د سپارلو پر مهال پژواک خبري اژانس ته وويل، چې په دغو وسلو کې ٩ ميله ار پي جي، ٧ ميله راکټ انداز، ٦ پيکا ماشيندارې، ٢٢ ميله کلاشينکوفونه، ٢ ميله ټوپک، ٢ ميله تومانچې او ٥ فيره د بي اېم يو مېزايل شامل دي.
هغه زياته کړه، چې دا وسلې يې له هغو کسانو څخه ترلاسه کړې، چې په ناقانونه توګه يې له ځان سره ساتلې وې.
د نوموړي په وينا، هغه ناقانونه وسلې، چې له خلکو سره دي، د دوى لخوا کله نا کله د دولت او خلکو پر وړاندې د نا امنۍ ستونزې پيدا کېږي.
د کونړ والي سيد فضل الله وحيدي پژواک اژانس ته وويل، چې دغه ټول ګامونه د جګړې د پاى ته رسېدو او د سولې د ټينګښت په موخه اخيستل کېږي.
وحيدى زياته کړه، چې ولسمشر حامد کرزي د ٦٢مې ګڼې فرمان له مخې، هغه امنيتي کمپنۍ، چې وسله لري، په راتلونکى کې به بې وسلې شي.
هغه وايي، چې د ياد فرمان د عملي کېدو په موخه په کونړ ولايت کې د ځينو ساختماني کمپنيو، چې د پروژو د پلې کېدو پر مهال يې د امنيت ساتنې په موخه يوه اندازه وسلې له ځانونو سره درلودې، د پروژو تر بشپړېدو وروسته يې امنيه قوماندانۍ ته سپارلي ،چې اوس د ډاياک پروګرام ته وسپارل شوې.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن