بازارک-تالقان (پژواک ٢٧ کب ٩٠): په پنجشېر ولايت کې د واورې ښويېدنې او په تالقانو ښار کې د چت د لوېدو له امله درې تنه مړه شول.
د پنجشېر د والي وياند حامدروشن پژواک ته وويل، چې د ياد ولايت د پريان ولسوالۍ په ځينو سيمو کې شاوخوا ٢٠برفکوچونه راغلي دي.
د هغه په وينا، دغه واورې ښويېدنې له تېرې ورځې راهيسې دوام لري، چې په ترڅ کې يې د يوه ماشوم په ګډون درې تنه مړه او يو بل ټپي شوى دى.
د پريان د ولسوال ياور مولوي احد احدي پژواک ته وويل، چې تېره شپه د يادې ولسوالۍ د ورياچ په کلي کې يو برفکوچ رامنځه شو.
د هغه په وينا، د يادو برفکوچونو د رامنځته کېدو له امله دوه تنه مړه او يو بل ټپي شوى دى او ١٠٠ څاروي هم له منځه تللي دي.
سرچينې څرګنده کړه، چې د ټپي روغتيايي حالت ښه دى او د سيمې د خلکو په مرسته له واورې څخه را وېستل شوى دى.
د سيمې يوه اسېدونکي بشير پژواک ته وويل، چې د تېرې اونۍ په ترڅ کې ډېره واوره اورېدلې او تېره شپه هم واوره ښويېدلې ده.
هغه زياته کړه: ((خلکو دوه مړي او يو ټپي، چې ويل کېږي شپانه دي، له واورې څخه را وېستلي او ١٠٠څاروي هم يخ وهلي و.))
د يوه بل خبر له مخې، د تخار په مرکز تالقانو ښارکې تېره شپه د باران اورېدو له امله د يوه کور چت را لوېدلى دى.
د تخار د امنيه قوماندانۍ وياند خليل احمد اسير پژواک ته وويل، چې د يادې پېښې له امله د ياد کور يو غړى مړ شوى او يو بل ټپي دى.
د هغه په وينا، دغه کور د تالقانو د ښار د خدايانو د نواباد په کلي کې نړېدلى او ټپي روغتون ته وړل شوى دى.
د تالقانو د ولايتي روغتون د نرسنګ امر ډاکټر کفايت الله صادقي پژواک ته د يادې پېښې د پخلي ترڅنګ وويل، چې د ټپي وضيعت نورمال دى او له درملنې وروسته له روغتون څخه رخصت شوى دى.
د ياد کور يوه ګاونډي بابه جان پژواک ته وويل: ((د ياد کور چت خام و او ډېره واوره يې د غورځېدو لامل شوه.))
هغه څرګنده کړه، چې د يادې پېښې مړى او ټپي دواړه نارينه و او د پېښې په وخت کې ښځې په کور کې نه وې.
دا په داسې حال کې ده، چې د تخار ولايت د مسوولينو په وينا، تېره اونۍ د ډېرې يخنۍ له امله په ياد ولايت کې څه باندې درې زره څاروي له منځه تللي وو.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن