لښکرګاه (پژواک ٢٦ ورى ٩١): په هلمند کې د يوې غونډې په ترڅ کې د سيمه ييزو سوداګرو له خوا په کابل کې د دارالا مان ماڼۍ د بيارغولو لپاره تر يو ميليون افغانيو ډېرې پيسې ټولې شوې.
دغه غونډه نن (د وري ٢٦مه) د هلمند په مرکز لښکرګاه کې جوړه شوې وه، چې د هلمند پر والي محمد ګلاب منګل سربېره نورو دولتي چارواكو او سيمه ييزو سوداګرو په کې ګډون کړى و.
په هلمندكې د سوادګرو د ټولنې مشر علي احمد ناصري پژواك اژانس ته وويل، چې د دوى د ټولنې لخوا پنځه سوه زره افغانۍ د دارلامان ماڼۍ د رغونې لپاره مرسته وشوه او په هڅه کې دي تر دې هم ډېر کومک ورسره وکړي.
ده هيله وښوده، چې ورکړل شوې پيسې به يې پر ځاى ولګېږي، تر څو د شتمنو خلكو او سوداګرو باور ډېر شي او په نورو ټولګټو پروژو كې هم مرستې وکړي.
د يادې ماڼۍ د رغولو لپاره د هلمند والي ګلاب منګل هم سل زره افغانۍ مرسته وکړه، چې ټول ټال په دغه غونډه كې يو ميليون او ۶۸زره افغانۍ او ۴۲۰۰ ډالر ټول شول، خو چارواكي د اټكل له مخې وايي، چې ښايي يواځې په هلمند كې د دارالامان ماڼۍ د رغولو لپاره تر لس ميليونه افغانۍ ټولې شي.
د هلمند والي محمدګلاب منګل غونډې ته د وينا پر مهال د هلمند له شتمنو خلکو وغوښتل، چې د هېواد د تاريخي سيمو په ساتلو كې پوره ونډه واخلي.
د هغه په وينا، د دارالا مان ماڼۍ د هېواد له لرغونو ماڼيو څخه ده چې دغه مهال يې رغولو ته اړتيا ده او خلك بايد له خپل توان سره سم کومک وكړي.
منګل زياته كړه: ((تر دې مهاله د دارالامان ماڼۍ د رغونې لپاره يواځې د كابل د ښاروالۍ له خوا د پيسو د راټولو هڅې پيل شوې، خو ښه به دا وي چې په ټول هېواد كې دا لړۍ پيل شي.))
د تېرې جنورۍ مياشتې په ١٥مه نېټه د کابل ښاروالۍ د ښار د يو شمېر لرغونو ودانيو د بيارغولو لپاره په يوه دولتي بانک کې د بسپنې را غونډولو لپاره رسمي بانکي حساب پرانيست.
د دارلامان او چهلستون ماڼۍ او تاجبيک تپه هغه تاريخي ځايونه دي، چې ښاروالۍ يې د افغانانو د بسپنې په پيسو د جوړولو په موخه بانکي حساب پرانيستى دى.
د يادونې ده، چې د دارلامان ودانۍ د افغانستان د پخواني پاچا امان الله خان او تيمورشاه د واکمنۍ پر مهال جوړه شوې او په نوييمه لسيزه کې د کورنيو جګړو پر مهال سخت زيانونه ورته واوښتل.
Visits: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن