اسعداباد (پژواک ١٩ غبرګولى ٩١): په کونړ کې د ملي پيوستون دپروګرام مسوولين وايي، ٦٧ ټولګټې پروژې تر بشپړيدو وروسته ګټې اخيستنې ته وسپارل شوې.
په کونړ ولايت کې دملي پيوستون دپروګرام مشر انجينر ميرزمان مومند د غبرګولي په ١٩ مه پژواک اژانس ته وويل، چې دغه پروژې د ملي پيوستون لخوا د يو١،٧ ميليونه ډالرو په ارزښت په ١٣ ولسواليو کې ترسره شوې او نن ګټې اخيستنې ته وسپارل شوې.
د هغه په وينا، په دغو پروژو کې سربندونه، استنادي ديوالونه، د صحي اوبو څاه ګانې، د څښلو اوبو شبکه ، د لارو کوڅو پخول ، د اوبو برېښنا، کارېزونه او سړک جوړونې پروژې شاملې دي.
نوموړي زياته کړه، چې يادې پروژې د مرکز په ګډون په ١٣ ولسواليو، پېج دره، سرکاڼو، شيګل، وټه پور، نرنګ، ناړۍ، غازي اباد، خاص کونړ، دانګام ، چپه دره او څوکۍ کې د خلکو په ١٠% ونډه بشپړې شوې، چې ١٦ زره کورنۍ به ترې ګټه واخلي.
ميرزمان زياتوي: ((تر اوسه په کونړ کې ١٨ سوه ٩١ پروژې د ملي پيوستون د پروګرام له لارې منظور شوې، چې له دې جملې څخه يې ١٣ سوه ٣٩ يې بشپړې شوې او پر پاتې نورو يې کار روان دى.))
د کونړ والي سيدفضل الله وحيدي د دغو پروژو د پرانېستې پرمهال وويل، چې دغه پروژې د دولت په همکارۍ او خلکو په مټ جوړې شوي دي.
د هغه په وينا، خلک بايد د دغو پروژو په ساتنه کې له دولت سره مرسته اوهمکاري وکړي.
نوموړي له خلکو وغوښتل، چې دوى دې د ملي پيوستون په پروژو کې داسې پروژې وټاکي، چې ګټه يې ټولو کليوالو ته ورسېږي.
د څوکۍ ولسوالۍ د شلوټۍ سيمې اوسيدونکى شاه جهان پاچا پژواک اژانس ته وويل، چې د ملي پيوستون پروژې د خلکو په خوښه او همکارۍ جوړې شوې دي.
د هغه په وينا، دوى د دغو پروژو د پلي کېدو مننه کوي او د امنيت راوستو کې ډېرې ګټورې تمامېږي.
د يادونې ده، چې په کونړ کې د ملي پيوستون پروګرامونه په چټکۍ سره روان دي او تراوسه د وسلوالو مخالفينو لخوا هم خنډونه نه دي ورته جوړ شوي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن