د بغلان ولايت د امنيه قواماندانۍ قوماندان مل پاسوال اسدالله شيرزاد د پيښې له ځايه د غبرګولي په ٢٢مه پژواک خبري اژانس ته وويل، چې د دى ولايت په برکه ولسوالۍ کې د شوي زلزلې له امله د ملاجان په کلي کې شاوخوا ٩٠تنه وژل شوي او ٢٥ کورونه په بشپړه توګه د غره د ښويدو له امله د خاورو لاندې شوي دي.
نوموړي زياته کړه چې په وژل شويو کسانو کې ښځې ،ماشومان،ځوانان شامل دي.
شيرزاد له مرکزې حکومت څخه د بيړنۍ مرستې غوښتنه وکړه او زياته يې کړه چې د پيښې له ځايه د وژل شويو کسانو جسدونه په بيلچو او کولنګونو نه راوځي بلکې پرمختللي وسايلو ته اړتيا ده.
د شيرزاد په خبره په دغه کلي کې ټول اوسيدونکي او حيوانات مړه شوي او کلي په بشپړه توګه لمنځه تللي دي.
د يادې پيښې څخه يواځې دوه تنه ژوندي پاتي شوي چې يو يې جمعه خان او بل يې دښونځي زده کوونکي صمد نوميږې.
جمعه خان پژواک ته وويل :((زه ځکه ژوندى پاتي يم چې بل کلي ژرندې ته مې غنم وړي وو.))
ده وويل چې په دغه کلي کې هيڅوک ژوندي نه دي پاتي .
بل ژوندى پاتې شوى صمد وايي :((زه د بل کلي په ښځونځي کې سبق وايم او د زلزلې پرمهال په کلي کې نه ووم ځکه چې زه ښځونځي ته تللي ووم.))
نن له غرمې مخکې دافغانستان مرکزي،شمالي، شمال ختيځ او شمال لوېديځ ولايتونه د زلزلې دوو ټکانونو و لړزول .
لومړى ټکان د ريکتر په کچه ٥،٤ درجې او دويم ټکان ٥،٦ درجې ثبت شوى دى .
د بغلان ولايت له طبيعي پېښو سره د مبارزې مشر نصير کهزاد پژواک خبري اژانس ته وویل،چې دوى ته د رسېدلي لومړنيو راپورونو له مخې، د زلزلې د ټکانونو په پايله کې د برکې ولسوالۍ د جان محمد خان په کلي کې غر ښوېدلى ،چې له امله يې په شلو کورونو کې ٨٠ تنه تر خاورو لاندې شوي دي .
د هغه په وينا، د نن ورځې په زلزله کې په نهرين ، جلګه او ګذرګه نور ولسواليو کې ٢٥ کورونه ويجاړ شوي، چې له امله يې شپږ تنه ټپيان ټپيان شوي دي .
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن