کابل (پژواک ٢٣لړم ٩١) : د افغانستان له ملي دفاع وزارت سره د ترکيې هېواد له خوا د وسايلو او لوازمو مرسته وشوه.
دغه ټکى د ملي دفاع وزارت د هداياوو مدير ډګروال پيرمحمد توراني د لړم په ٢٣مه پژواک اژانس ته په ډاګه کړ .
نوموړي زياته کړه ، چې په دې مرسته کې ۷ عرادې موټر، چې په کې ، د قوماندان د کنټرول يو عراده موټر ، يو د پرسونل د لېږد موټر ، يو د ټپيانو د لېږد امبولانس ، دوه عرادې د ډوډۍ پخولو هغه ګرځنده داشونه دي ، چې په يوځل هر يو يې د (٥٠٠ ) ډوډيو پخولو وړتيالري او دوه عرادې د جامو وينځولو هغه سيار ماشينونه دي ، چې هر يو يې په يوځل د (٥٠٠) جوړو جامو د وينځولو وړتيالري .
توراني وويل ،چې په دغو مرستو کې دوه پايې سل کيلو واټه او دوه پايې ديرش کيلو واټه جنراتورونه هم شامل دي .
نوموړي زياته کړه ، چې د يادو وسايلو او لوازم ټوليز ارزښت پنځه سوه او دوه ديرش نيم زره ( ٥٣٢٥٠٠ ) امريکايي ډالره ده ، چې خپله د ترکيې هېواد له توليداتو څخه شمېرل کيږي .
ده وويل، چې ياد وسايل او لوازم نن د کابل په هوايي ډګر کې د هېواد د ملي دفاع وزارت اړوندې څانګې ته وسپارل شول .
د توراني په خبره ، چې ترکيه هر کال له يو ميليون څخه تر يونيم ميليونو ډالرو په ارزښت د بېلابېلو وسايلو او لوازمو مرسته کوي.
د يادونې ده ، چې ترکيې د لړم په ١٩ مه ، د استانبول په ښار کې د ملي اردو ٢٨ سرتېري تر ځانګړو زده کړو وروسته فارغ کړل .
ترکيه په افغانستان کې د بيارغونې ، روغتيا، پوهنې او په بېلابېلو نورو څانګو کې د مرستو ترڅنګ لومړنی اسلامي هېواد دی، چې د ناټو په چوکاټ کې يې افغانستان ته ۱۸۴۵ پوځيان را استولي دي او دغه هېواد په جوزجان او ميدان وردګو ولايتونو کې د ولايتي بيارغونې (پي ار ټي ) ډلې هم لري ، چې په ملکي خدمتونو بوختې دي .
د تېر کال (١٣٩٠) د کب په ٢٦مه په کابل کې له يوه کور سره د ترکيې د چورلکې د جنګېدو له امله ۱۲ ترکي پوځيان مړه شول .
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن