اسلام اباد (پژواک ١٢ لېندۍ ٩١): چارواکي وايي، چې د پاکستان په سوېلي وزيرستان د بې پېلوټه الوتکې په بريد کې د القاعده شبکې غړى عبدالرحمان يمني وژل شوى دى.
په سوېلي وزيرستان کې يوه دولتي چارواکي شاهد علي رسنيو ته وويل، چې دغه بريد تېره شپه د سوېلي وزيرستان مرکز واڼه ته نږدې د ورسک په سيمه کې شوى دى.
د هغه په وينا، د بې پېلوټه الوتکې له خوا په ياده سيمه کې هغه موټر په نښه شو، چې د القاعده شبکې غړى عبدالرحمان يمني په کې و.
خو د سيمې يو ځايي خبريال ظفر وزير پژواک اژانس ته وويل، چې په بريد کې وژل شوى کس په بشپړه توګه سوځېدلى او تر اوسه دا نه څرګنديږي، چې څوک دى.
بلخوا ځينې سرچينې وايي، چې په دغه بريد کې څلور تنه وژل شوي او ګڼ شمېر نور ټپيان دي.
د يادونې ده، چې دوه ورځې مخکې هم بې پېلوټه الوتکو په ياده سيمه کې پر يوه موټرسايکل ميزايل توغولې وو او يو تن په کې وژل شوى وو.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن