جلال اباد (پژواک۱۴ سلواغه ۹۱): پاکستاني ځواکونو د تورخم دروازه، چې څو ورځې مخکې يې د بې اسنادو افغانانو پر مخ تړلې وه، بېرته خلاصه کړې ده.
په تورخم کې د سرحدي زون د لومړۍ لوا د کميسارۍ مرستيال سمونيار نثاراحمد د سلواغې په ۱۴مه پژواک خبري اژانس ته وويل، چې له پرون راهيسې د تورخم پر دروازه هر څوک، که قانوني اسناد ولري او که يې ونه لري، په ازاد ډول تګ راتګ کولی شي.
هغه زياته کړه: ((ټوله ستونزه د خبرو اترو له لارې هواره شوې او انشاءالله په راتلونکي کې به دا ډول ستونزه نه رامنځته کېږي.))
د پاکستاني پوله ساتونکو يوه چارواکي، چې د نوم له اخيستو يې ډډه کوله پژواک خبري اژانس ته وويل، له مرکزه ورته امر شوی، چې مسافرو ته دې پر دروازه د تګ راتګ اجازه ورکړي.
خو سرچينه زياتوي، چې د دروازې د بشپړې خلاصېدو اجازه لا تر اوسه نه ده ورته شوې.
په تورخم کې يو هټۍ وال رحمان ګل وايي، چې له پرون راهيسې مسافرين کولی شي ، چې په ازاده توګه د تورخم پر دروازه تګ راتګ وکړي.
دی زياتوي، کله ناکله دروازه د څو دقيقو لپاره بنديږي، خو ډېر ژر بېرته پرانيستل شي.
د تورخم دروازې د تړلو او خلاصولو موضوع وروسته له هغه رامنځته شوه، کله چې پوليسو په کابل کې يو شمېر پاکستاني مزدوران ووهل او د هغوى پاسپورټونه يې وشلول.
له تېرو دوو مياشتو راهيسې پاکستاني ځواکونو څو څو وارې دغه دروازه وتړله او تر خبرو اترو وروسته يې بيا پرانيستله.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن