لښکرګاه (پژواک ١٥ سلواغه ٩١): د هلمند په خانشين ولسوالۍ کې د ماين چاودنې د يوې کورنۍ د څلورو غړو په ګډون پنځه عام وګړي وژلي دي.
د خانشين ولسوال شاه محمود مير د سلواغې په ١٥مه پژواک خبري اژانس ته وويل، چې دا چاودنه پرون ناوخته د دې ولسوالۍ د خيراباد په سيمه کې شوې ده.
هغه زياته کړه، چې د ناوې ولسوالۍ اوسېدونکي په موټر کې خانشين ته پر لاره و، چې په ياده سيمه کې يې پر موټر چاودنه وشوه.
د نوموړي په وينا، په دې پېښه کې ښځه او خاوند، دوه لوڼي يې او يو موټر چلوونکى وژل شوي دي.
ولسوال د دې چاودنې پړه د هېواد د سولې او امنيت پر دښمنانو واچوله او زياته يې کړه، چې پوليسو يې په اړه پلـټنې پيل کړې دي.
وسلوالو مخالفينو تر اوسه په دې اړه څه نه دي ويلي.
بلخوا د هلمند امنيه قومانداني وايي، هغه دوه وسلوال طالبان يې نيولي چې څه موده مخکې يې په لښکرګاه کې يو پوليس وژلى و.
د قوماندانۍ مطبوعاتي دفتر زياتوي، چې دغه کسان تېره ورځ په موسى کلا ولسوالۍ کې نيول شوي او اوس لښکرګاه ته لېږدول شوي دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن