کابل (پژواک ۲۲ سلواغه ۹۱ ) : د پاکستان د یوې مذهبي ډلې جمعیت علما اسلام مشر اود طالبانو نږدې ملګری مولانا فضل الرحمن د افغانستان دسولې د خبرو ا ترو لپاره قطر ته رسیدلی دی.
ددغه مذهبي ګوند یوه غړی حافظ حسین احمد پرون د خیبر پښتونخوا ایالت په نوښار سیمه کې یوې غونډې ته د وینا پر مهال ویلي دي چې مولانا فضل الرحمن په ولسي جرګه کې د قبایلي سیمو دیو شمیر وکیلانو په ملتیا قطر ته رسیدلی دی.
هغه زیاته کړه چې مولانا فضل الرحمن به په قطر کې د طالبانو او افغان حکومت ترمنځ د خبرو اترو د پرمختګ لپاره منځګړیتوب کوي.
حافظ حسین احمد داهم ویلي دي چې په قطر کې لا دمخه د دخیلو ډلو ترمنځ خبرې اترې پیل شوې دي او مولانا فضل الرحمن به ددې خبرو اترو د بریالیتوب لپاره خپل رول ادا کوي.
د یاد ګوند مولانا اجمل خان ویاند د قطر یوې عربي رسنۍ ګلف ټایمز ته تایید کړی چې مولانا فضل الرحمن د قطر پلازمینې دوحې ته رسیدلی دی.
خو د پاکستان د بهرنیو چارو وزارت تراوسه په دې اړه په رسمي توګه څه نه دي ویلي.
د جمعیت علما اسلام ګوند ویاند زیاته کړې چې مولانا فضل الرحمان به درې ورځې په قطر کې وي .
دا په داسې حال کې چې ټاکل شوې ده، چې دافغانستان د علماوو یو پلاوی پاکستاني علماوو سره په کابل کې د علماوو د ګډ کانفرانس جوړولو لپاره د خبرو اترو په موخه نن اسلام اباد ته ولاړ شي.
