کابل (پژواک ٧ کب ٩١): د افغانستان د کرکټ بورډ له خوا د کرکټ د ملي لوبډلې مخکني کپتان نوروز منګل ته د ښو لاسته راوړنو په وياړ ستاينليک ورکړ شو.
نوروز منګل، چې له تېرو څو کلونو راهيسې د هېواد د کرکټ د ملي لوبډلې د کپتان يا لوبـډلمشر په توګه پاتې شوى و، تېره ورځ له دې دندې لرې او د هغه پر ځاى محمد نبي عيسى خېل وټاکل شو.
نوروز منګل به له دې ورروسته په لوبډله کې د يوه عادي لوبغاړي په توګه ولوبيږي.
د کرکټ بورډ وياند فريد هوتک د کب په ٧مه پژواک خبري اژانس ته وويل، چې د افغانستان کرکټ بورډ عمومي مشر او سلاکار وزير شهزاده مسعود او د افغانستان کرکټ بورډ اجراييوي رييس ډاکټر نورمحمد مراد تېره ورځ ناوخته د يو لړ مراسمو په ترڅ کې د افغانستان کرکټ لپاره د نوروز منګل د خدمتونو په وياړ هغه ته ستاينليک ورکړ.
شهزاده مسعود د افغانستان کرکټ په ډګر کې د نوروز منګل هلې ځلې نه هېروېدونکې وبللې او نوموړې ته يی د زيرک کپتان لقب ورکړ.
د هغه په وينا، نوروز منګل په تېرو څو کلونو کې وکولاى شول، چې په خپلې ښې رهبرۍ سره لوبډله يو موټي او په لوړ مورال کې وساتي، چې د ده دغه اخلاقي معيارونه به د تل لپاره د افغانستان د ملي لوبډلې لوبغاړو ته د يو اصل په توګه پاتې وي.
د کرکټ بورډ اجرائيوي رييس وويل، چې د نوروز منګل په کپتانۍ کې افغانستان دوه ځلې د کرکټ شل اووريز نړيوال جام ته لار پيدا کړه، د انټرکانټنېنټال يا لويو وچو جام يې وګاټه، د پنځو ډوېژنونو اتلولۍ يې خپلې کړې او د يو ورځني نړيوال کرکټ دريځ يې خپل کړ.
هغه هم د نوروز منګل د خدماتو د ستاينې ترڅنګ زياته کړه، چې دغه راز د نوموړي په کپتانۍ کې افغانستان اسيا چلېنج او ايليټ کپونه يې وګټل او ګڼ شمېر نورې برياوې يې هم خپلې کړې.
نوروز منګل د کرکټ بورډ له خوا د ستاينليک په ورکولو مننه کړې او ژمنه يې وکړه، چې دى به د يوه لوبغاړي په توګه د افغانستان د کرکټ لپاره خپلو خدمتونو ته ادامه ورکوي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن