چاريکار( پژواک ١٩ کب ٩١): د سالنګ لويه لار، چې د توپان له امله تړل شوې وه، د ترافيکو پر مخ پرانيستل شوه.
دغه لاره چې د هېواد مرکز له نهو شمالي او شمال ختيځو ولايتونو سره نښلوي، تېره ورځ له غرمې وروسته د ترافيکو پر مخ تړل شوې وه.
د پلخمري په ملخان او د پروان ولايت د جبل السراج ولسوالۍ په تاجکانو کې موټر درول شوي وو او پر دې لاره د تګ اجازه نه ورکول کېده.
خو د سالنګونو د ساتنې او مراقبت امر ياور سميع الله نن څه باندې ١٢ بجې پژواک خبري اژانس ته وويل، چې توپان درېدلى او لاره له وارو څخه تر پاکېدو وروسته د ترافيکو پر مخ پرانيستل شوه.
دغه لار په غرونو کې له څه باندې دوه نيم کيلومتره اوږده تونل څخه تېريږي.
په ژمي کې پر دې لاره تګ راتګ له ډېرو ستونزو سره مخ وي.
څو ورځې مخکې د واورې ښويېدو له امله د سالنګونو د ساتنې او مراقبت امريت دوو کارکوونکو پر همدې لاره د واورې ښويېدو له امله خپل ژوند له لاسه ورکړ.
د ١٣٨٨ کال د سلواغې په مياشت کې په سالنګ کې په لسګونو خلک د واورو له امله مړه شول.
Visits: 4
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن