غزني-ښرنه (پژواک ١٦ غويى ٩٢): چارواکي وايي، تېره شپه ناوخته د غزني په قره باغ ولسوالۍ کې درې وسله وال د خپل ماين چاودنې وژلي او درې نور ټپيان شوي، بلخوا د پکتيکا په سر روضه کې يو ځانمرګى نيول شوى دى.
د قره باغ ولسوال فضل الرحمن نظروال وايي، چې وسله والو ته دغه مرګ ژوبله پر سړک د ماين خښولو پر مهال په رامنځته شوې چاودنه کې اوښتې ده.
ولسوال پژواک اژانس ته وويل، چې چاودنه د ولسوالۍ شمال لوري ته په يو کليومتري کې د کوبي په سيمه کې رامنځ ته شوې ده.
خو په سيمه کې يو عيني شاهد، چې نه غواړي نوم يې واخيستل شي وايي، چې پنځه وسله وال د خپل ماين په چاودنه کې ووژل شول.
هغه زياته کړه، چې دغه چاودنه ډېره زوروره وه او د وسله والو مړي له پېژندلو وتلي دي.
دغه راز د يو بل خبر له مخې، د پکتيکا په سر روضه کې يو ځانمرګى خپلې موخې ته له رسېدو مخکې د امنيتي ځواکونو له لوري ونيول شو.
په پکتيکا کې د سيمه ييزو پوليسو عمومي قوماندان عزيزالله کاروان وايي، چې ځانمرګي واسکټ اغوستي و او په ځان پسې يې نور چاودېدونکي توکي هم تړلي وو.
د ده په وينا، دغه کس غوښتل د سيمه ييزو پوليسو د يو سرتېرې په کور کې ځان ته چاودنه ورکړي، خو موخې له رسېدو مخکې ونيول شو.
د يادو دواړو پېښو په اړه تر دې مهاله وسله والو څه نه دي ويلي.
Visits: 11
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن