مزارشريف ( پژواک ٢ غبرګولى ٩٢ ) : د بلخ په مرکز مزارشريف ښار کې د دوه ښوونځيو د ودانيو کار بشپړ او ګټې اخيستنې ته چمتو شول.
د دغه ولايت د پوهنې رييس قيس مهراين د غبرګولي په ۲مه، پژواک خبري اژانس ته وويل، چې د يو اين هبيتات او UNICF موسسو له خوا د ۴۵۰ زره امريکايي ډالرو په لګښت د دوه ښوونځيو ودانۍ جوړې شوې.
نوموړي زياته کړه، چې د شېخ محمد صديق شهاب د لېسې ودانۍ، چې ۱۶ درسي او اداري خونې لري، د هبيتات د ۱۵۰ زره امريکايي ډالرو او د سيمې د خلکو د ۲۵ زره افغانيو په لګښت جوړه شوه.
د هغه په وينا، د يادې ودانۍ په جوړېدو د دغه ښوونځي ۴۰۰۰ زده کوونکو ته د لوست اسانتيا برابرې شوې.
همداراز د غلام محمد ميمنګي لېسې دوه ودانۍ د يو اين هبيتات او UNICF موسيسو له خوا د ۲۴۵ زره امريکايي ډالرو په لګښت جوړې شوې.
نوموړي زياته کړه، چې په يادو ودانيو کې هم ۲۰ سلنه لګښت د سيمې اوسېدونکو وړکړی دی.
د هغه په وينا ، له جوړيو شويو ودانيو څخه يوه ۱۲ درسي او اداري خونې او بله ۱۶ درسي او اداري خونې لري، چې په يو پوړ کې جوړې شوې دي.
د شيخ محمد صديق شهاب ښوونځي د يوولسم ټولګي زده کوونکي احمد رسول پژواک خبري اژانس ته وويل، چې له دې مخکې يې د ښوونځي له نيمايي ډېر ټولګي په ازاده هوا او خېمو کې وو.
نوموړي زياته کړه، چې جوړې شوې ودانۍ په ښه توګه جوړې شوې او د دغه ښوونځي د ټولو ټولګيو د زده کوونکو لپاره پکې د زده کړو اسانتيا برابره شوې ده.
د پوهنې رييس وويل،چې په بلخ ولايت کې ۵۰۴تعليمي ادارې دي، ۱۰۱۹۹رسمي ښوونکي لري، ۵۴۰۱۷۸زده کوونکي پکې په زده کړو بوخت دي، چې ۳۱۱۳۶۶ يې هلکان او ۲۲۸۸۱۲ نجونې دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن