لښکرګاه (پژواک ١٥ چنګاښ ٩٢): د هلمند په مرکز لښکرګاه کې د فوټبال دوه مياشتنۍ پيل شوې سيالۍ تېره ورځ د هارون پوپل لوبډلې په بريا پاى ته ورسېدې.
د هلمند د المپيک امر ادريس عليزي پژواک اژانس ته وويل، سيالۍ دوه مياشتې او لس ورځې وړاندې د کرزي په لوبغالي کې د ١٧ لوبډلو تر منځ پيل شوې وې.
د ده په خبره، چې پاى لوبې ته هارون پوپل او قانون لوبډله ووتې، خو د دې دوو لوبډلو تر منځ سيالۍ کې دوه صفر د هارون پوپل په ګټه پاى ته ورسېده او درېيم مقام ياران لوبډلې واخيست.
عليزي زياته کړه، د لوبو موخه دا وه، چې له ١٧ لوبډلو به لس غوره اعلانيږي او هغه به بيا کولى شي، چې د هېواد په کچه ولايتي او ملي سياليو کې برخه واخلي.
د ده په خبره، دغه راز يې له يادو لوبو يوه موخه دا وه چې ځوانان لوبو ته وهڅول شي، له جګړې، نشه يي توکو او نورو ناوړه کارونو راوګرځول شي.
د لوبو په وروستيو کې د لوبغاړو له خوا د پټاکيو چاودنې او هوايي ډزې ترسره شوې، خو دغو ډزو د لښکرګاه ښاريان ووېرول.
د لښکرګاه يو اوسېدونکى عبدالخالق وايي، چې د يادو ډزو له امله بازار وتړل شو او په خلکو کې د وېرې له امله څو ترافيکي پېښې هم رامنځته شوې.
د امنيه قوماندانۍ د مطبوعاتي دفتر مسوول شاه محمد اشنا هم وويل، چې وروسته پوليس سيمې ته ورسېدل او د ډزو مخنيوى يې وکړ.
د المپيک امر وايي، دوى نه پوهېدل، چې په دغه کار سره به په ښار کې وېره خپره شي.
Visits: 5
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن