کندوز (پژواک ٢١ چنګاښ ٩٢): د کندوز په امام صاحب ولسوالۍ کې د پوليسو او وسله والو تر منځ نښته کې اته طالبان وژل شوي او شپږ پوليس ټپيان دي.
د کندوز د امنيه قوماندانۍ د مطبوعاتي دفتر مسوول سيد سرور حسيني پژواک خبري اژانس ته وويل، چې دغه درې ساعته نښته تېره ورځ له غرمې وروسته، هغه مهال د هجران سيمې په قرغان تيپه کلي کې رامنځته شوه، چې طالبانو د پوليسو پر ګزمې بريد وکړ.
د ده په وينا، چې په وژل شوو کې د حقمل، محمدرحيم او بشيراحمد تاجکي په نومونو د مخالفينو درې قوماندانان هم شامل دي.
دى وايي، چې بشيراحمد د تاجکستان تبعه دى.
د حسينې په وينا، د يادې نښتې پر مهال يو طالب، يو سيمه ييز پوليس او پنځه ملي پوليس ټپيان او درې وسله وال مخالفين نيول شوي دي.
د سيمې يو اوسېدونکى وايي، چې تېره ورځ له غرمې تر ماښامه په ياده سيمه کې نښته روانه وه، خو دى يې د مرګ ژوبلې په اړه معلومات نه لري.
د هغه په وينا، کله چې نښته پاى ته ورسېده او دى له کوره ووت، ويې ليدل چې د پوليسو دوه رنجر موټر د سوځېدو په حال کې و.
وسله والو په دې اړه تر اوسه څه نه دي ويلي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن