کابل (پژواک ٢٥ چنګاښ ٩٢): د ملي اېتلاف يوه سرچينه وايي، چې عبدالرب رسول سياف راتلونکو ولسمشريزو ټاکنو ته خپله کانديدي اعلان کړې، مارشال فهيم او محقق يې هم د خپلو مرستيالانو په توګه ټاکلي دي.
د دولت د سياسي مخالفې ډلې ملي اېتلاف يوه لوړ پوړي چارواکي پژواک خبري اژانس ته وويل، چې يو شمېر مطرحو سياسي څېرو تېره شپه په کابل کې د مارشال فهيم په کور کې د يوې غونډې په ترڅ کې پر ياده موضوع هوکړه کړې ده.
د دې سرچينې په وينا، په دې غونډه کې عبدالرب رسول سياف، مارشال محمد قسيم فهيم، اسماعيل خان، عبدالله عبدالله، يونس قانوني او يو شمېر نورو پخوانيو جهادي شخصيتونو ګډون درلود.
د ملي اېتلاف دغه چارواکي وويل: ((په دې ناسته کې د استاد سياف په کانديدۍ او مارشال فهيم او محمد محقق په مرستيالۍ پرېکړه وشوه او له عبدالله عبدالله او قانوني څخه د دې طرحې د ملاتړ غوښتنه وشوه.))
د اسلامي اتحاد ګوند پخوانى مشر عبدالرب رسول سياف، چې د مجاهدينو له مطرحو ګوندونو څخه و، اوس مهال د دعوت اسلامي ګوند مشري پر غاړه لري او په ولسي جرګه کې د کابل د خلکو استازى دى.
عبدالرب رسول سياف ته يوه نږدې کس په ياده ناسته کې د رسول سياف د ګډون پخلى وکړ، خو په دې اړه يې د جزئياتو له ورکړې بې خبري وښوده او محمد محقق هم وويل، چې په دې اړه څه معلومات نه لري.
د ملي اېتلاف د دغه مقام په وينا، دا غوښتنه د اسماعيل خان په منځګړيتوب شوې؛ خو ډاکتر عبدالله د دې غوښتنې له منلو ډډه کړې او ويلي يې دي، چې په دې اړه به وروستى تصميم د ملي اېتلاف د لارښودې شورا له خوا ونيول شي.
عبدالله عبدالله د ملي اېتلاف مشر دى، چې د ١٣٨٨ لمريز کال د ولسمشرۍ په ټاکنو کې د حامد کرزي لوى سيال و.
ويل کېږي ، چې يونس قانوني هم د يادې طرحې غوښتنې ته پرېکنده ځواب نه دى ورکړى.
له عبدالله عبدالله نه له دغه تازه ټاکنيز اېتلاف څخه د ملاتړ غوښتنه داسې مهال کېږي، چې د پژواک د ترلاسه شوو معلوماتو له مخې، د ملي اېتلاف کاري کمېټې په خپله وروستۍ ناسته کې د ولسمشرۍ راتلونکو ټاکنو ته د عبدالله عبدالله له کانديدۍ ملاتړ کړى دى.
د ټاکنو د قانون لايحه له زياتو بحثونو وروسته تېره ورځ د مشرانو او ولسي جرګو د ګډ کمېسيون له خوا د ځينو بدلونونو په راوړلو سره تصويب او د ولسمشر توشېح ته واستول شوه.
ټاکل شوې، چې د ولايتي شوراګانو او ولسمشرۍ ټاکنې د ١٣٩٣ لمريز کال د وري مياشتې په ١٦مه نېټه ترسره شي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن