کابل ( پژواک ۱۸ زمری ۹۲ ) : د کورنیو چارو وزارت امنیتي مرستیال وایي چې د ډیورنډ د کرښې هاخوا د وسلوالو ډلو ځالې ددې لامل شوي چې د هیواد ډیرې سیمې ناامنه کړي.
د کورنيو چارو وزارت امنيتي معين عبدالرحمن رحمن دغه څرګندونې پکتيکا ولايت ته دیوه سفر پر مهال کړې دي.
د دغه ولایت مقام مطبوعاتي دفتر لخوا د زمري په ۱۸مه، پژواک خبري اژانس ته په یوه رالیږل شوې خبرباڼه کې راغلی دي د کورنيو چارو وزارت د امنيتي چارو مرستیال سترپاسوال عبدالرحمن رحمن د يوه پوځي پلاوي په ملتيا د کوچني اختر په دوهم ورځ سرحدي ولايت پکتيکا ته د سفر پرترڅ کې د ياد ولایت والي محب الله صميم سره ددې ولايت پر اوسنيو امنيتي حالاتو خبرې وکړې .
رحمن ددې لیدنې پر مهال په ډاګه کړه، چې د دولت د وسلوالو مخالفينو پټنځايونه د ډېورنډ د کرښې ها خوا دي چې له امله يې سرحدي ولايتونه ګواښل کيږي .
سترپاسوال عبدالرحمن رحمن زياته کړه چې هغه د مېړانې مډال هم له ځان سره لري کوم چې د ولسمشر له لوري د پکتيکا ملي پوليسو ته د دوی د ښو کړنو له امله منظور شوی دی.
د پکتيکا والي محب الله صميم له ولسمشر حامد کرزي مننه وکړه چې د پکتيکا ملي پوليس يې د مېړانې په مډال وستايل او زياته کړه چې د پکتيکا امنيتي ځواکونه به هيچا ته هم د ناامنۍ او يا کوم ګواښ اجازه ورنګړي .
سرچینه زیاتوي، د پکتيکا ملي پوليس په داسې حال کې د ولسمشر له لوري د مېړانې په مډال ستايل کيږي چې ددې ولايت ټولو امنيتي ځواکونو د يوه پراخ امنيتي پلان له مخې په مرکز او ټولو ولسواليو کې کلک امنيتي تدابير نيولي چې پرته له کومې امنيتي پېښې د اختر دوهمه ورځ هم په دې ولایت کې په خوښيو او مېلو ولمانځل شوه
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن