هرات (پژواک ٢ تله ٩٢): په هرات کې د سولې عالي شورا د ولايتي دفتر په نوښت د سولې اونۍ په وياړ د انځورونو نندارتون پرانيستل شو.
د هرات د سولې د شورا د دفتر رييس مولوي غلام سرور پژواک خبري اژانس ته وويل، چې په نندارتون کې د هرات د نقاشانو ۴۰ په لاس جوړ شوي انځورونه نندارې ته اېښودل شوي دي.
نوموړى زياتوي، دغه نندارتون به تر دريو ورځو پورې د هرات د خلکو پر مخ پرانيسى وي.
د مولوي غلام سرور په وينا، ټول انځورونه د سولې اړوند پيغام لري نو د دوى موخه دا وه، چې د خلکو په اذهانو کې د سولې پيغام پياوړى کړي.
د هرات يو قلموال همايون نظري، چې د دغو انځورونو نندارې ته راغلي و، پژواک ته وويل، چې په هر انځور کې يې د امن او سولې ځانګړي پيغامونه وليدل.
هغه د انځورګرانو د هنر ستاينه وکړه او زياته يې کړه، هر انځور سړي ته دا ور ښيي، چې جګړه او توپک له تباهۍ او بربادۍ پرته ټولنې ته بل څه نه شي ورکولاى.
د هرات پوهنتون د هنرونو پوهنځي د څلورم کال محصله فرشته هغه انځورګره ده، چې په خپل لاس کښلې تابلو يې نندارې ته اېښې ده.
فرشتې په خپل انځور کې کوترې د الوتو په حالت کې تصوير کړې دي، چې دا وايي: ((کوتره د سولې سمبول دي او له ماشومتوبه يې په زړه کې و، خپل ولس ته به د سولې او امن پيغام رسوي، چې د کوترو د الوت تابلو يې په دې برخه کې لومړى ګام دى.))
دا په داسې حال کې ده، چې د سولې اونۍ په ټول هېواد کې د چارواکو او خلکو له لوري ولمانځل شوه.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن