پل علم (پژواک ٣ تله ٩٢): په لوګر کې د زورواکو له لوري د زرګونه جريبه غصب شوې ځمکې د بېرته راګرځولو لړۍ نن پيل شوه.
د لوګر والي ارسلا جمال د تلې په دريمه پژواک خبري اژانس ته وويل، چې په تېره يوه نيمه لسيزه کې شاوخوا دېرش زره جريبه دولتي ځمکه په دغه ولايت کې غصب شوې ده.
د نوموړي په خبره، د دغو ځمکو د غصب لپاره په بېلابېلو ادارو کې د ملکيت ناقانونه او جعلي اسناد جوړ شوي دي.
والي زياتوي، په لوګر کې داسې ځمکه نه ده پاتې، چې کوم زورواکي د ملکيت دعوا نه وي پرې کړې.
د هغه په وينا، د دغو ځمکو د بېرته راګرځولو لپاره يې يو کمېسيون ټاکلى، چې په لومړي ځل يې نن د لوګر د محبس ځمکه له غصبه راوګرځوله.
ارسلا جمال وايي، د لوګر د محبس لپاره لس جريبه ځمکه د سردار داوود خان په زمانه کې ځانګړې شوې وه، خو اوس د سيمې څو تنو پرې خېټه اچولې وه او دېوال يې ترې چاپېر کړى و.
د ده په خبره، د محبس ځمکه يې په رسمي توګه بېرته د محبس قوماندانۍ ته وسپارله.
ده زياته کړه، چې دا لړۍ به دوام وکړي.
د لوګر د ولايتي شورا رييس ډاکټر عبدالولي وکيل هم دا مني، چې په لوګر کې ډېرى دولتي او عامه ځمکې غصب شوې دي.
ده زياته کړه، چې د غصب شوو دولتي ځمکو بېرته راګرځول، د ستاينې وړ ګام دى او ولايتي شورا د نورو غصب شوو ځمکو د راګرځولو ملاتړ کوي.
د يادونې ده، د هېواد په ټولو ولايتونو کې زورواکو عامه او دولتي ځمکې لاندې کړې او ښارګوټي يې پرې اباد کړي دي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن