ګردېز( پژواک، ١٥ لړم ٩٢): د پکتيا امنيتي چارواکي وايي، چې له قاچاق وړونکو څخه يې يو شمير لرغونې سيکې او مجسمې نيولې دي .
د پکتيا امنيه قوماندان مل پاسوال زلمي اورياخېل پژواک ته وويل، چې په دغو تاريخي آثاروکې پنځه سيکې او درې مجسمې شاملې دي، چې له لوګر څخه پکتيا ته راوړل کېدې .
د پوليسو د استخباراتي راپور پر بنسټ يې دغه سيکې له يوې هديرې څخه چې قاچاق وړونکو بل ځاى ته د ليږد په موخه دلته ځاى پرځاى کړې وې ، لاسته راوړي، خو په تړاو يې څوک نه دي نيول شوي .
د اورياخېل په خبره، دغه سيکې ډيرې پخوانۍ دي او کېدای شي ارزښت به يې هم ډير وي .
د نوموړي په وينا، له څېړنو وروسته به دغه لرغوني اثار د افغانستان ملي موز يم ته وسپاري .
اورياخېل وايي، چې اوس هم زيات شمېر تاريخي اثار له لوګر او پکتيا څخه قاچاق کيږي او دوی به هڅه وکړي ، چې د دغو اثارو د قاچاق مخه ونيسي .
د لوګر ولايت د اطلاعاتو او کولتور رييس محمد شفيق پوپل وايي، چې په لوګر کې يو شمېر تاريخي سيمې شته ،چې دا ډول تاريخي اثار لري .
نوموړی وايي، تر اوسه دوی ته معلومات نشته ،چې دغه اثار د لوګر دي او که نه ، خو وايي، چې دوی به يې نوره پلټنه هم وکړي .
د يادولو ده ،چې اوس هم ځينو سيمو کې تاريخي اثار په غير قانوني ډول ايستل کيږي او د قاچاق په موخه نورو هيوادونو ته وړل کيږي .
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن