کابل (پژواک١٧ليندۍ٩٢): د ټاکنو خپلواک کمېسيون وايي، چې د راى پاڼو د ډيزاين چارې بشپړې شوې دي او ډېر ژر به يې د چاپ په موخه داوطلبۍ ته وړاندې کړي.
ددې کمېسيون چارواکي وايي، چې په پام کې لري د راتلونکو ولسمشريزو او ولايتى شوراګانو د ټاکنو لپاره د رايې ورکولو ١٣ ميليونه پاڼې چاپ کړي.
ددې کمېسيون وياند نورمحمد نور پژواک خبري اژانس ته وويل ، چې راى پاڼې به د چاپ په موخه د ملګرو ملتونو د پراختيا پروګرام (UNDP) له لارې ډېر ژر داوطلبۍ ته وړاندې شي.
نور وايي، چې په داوطلبۍ کې به د چاپ کورني او بهرني شرکتونه ګډون ولري.
ده زياته کړه:”دا زموږ حساس مواد بايد له هغو کمپنيو سره چې معتبرې دي، تړون وشي، نه دا چې، مخکې له دې چې کمېسيون ته ورسېږي، بهر ووځي، ځکه چې د هرې راى ورقې لپاره موږ، سريال نمبر او د سيکورټي يا امنيت لپاره ځينې مشخصې نښې ورته په پام کې نيولي.”
نور وويل ، چې د ټاکنو کمېسيون به په داوطلبۍ کې له بريالي شرکت څخه غواړي، که د ولسمشرۍ ټاکنې دويم پړاو ته ځي، نو دوى بايد ورته په ټاکلي وخت کې نورې پاڼې چمتو کړاى شي.
د اساسي قانون له مخې، د دويم پړاو ټاکنې بايد د پايلې تر اعلان وروسته په دوو اونيو کې ترسره شي.
نور يادونه وکړه ، چې د ټاکنو خپلواک کمېسيون د راى پاڼو د ډيزاين چارې بشپړې کړې دي.
دې کمېسيون څو اونۍ وړاندې د قرعه کشۍ له لارې په راى پاڼو کې د ولسمشرۍ د کانديدانو موقعيت وټاکه.
نور وويل، چې که تر دې وروسته د ولسمشرۍ کانديدان د يو بل په ګټه تېر هم شي، عکسونه يې په راى پاڼه کې چاپېږي.
د راتلونکي کال ولسمشرۍ ټاکنو ته ١١ تنو او د ولايتي شوراګانو لپاره څه دپاسه ٢٧٠٠ تنو ځانونه کانديد کړي دي.
نور وويل، چې د راى پاڼو د چاپولو لګښت به تر داوطلبۍ وروسته څرګند شي.
دا چې کورنۍ مطبعې په دومره لويه پيمانه د راى پاڼو د چاپ وړتيا لري که نه، خو په داوطلبۍ کې برياليتوب به يې پر دې پورې هم تړلې وي ،چې د ټاکنو خپلواک کمېسيون د راى پاڼو د ساتنې په برخه کې پرې باور وکړي.
خو د افغانستان د صنعتکارانو د ټولنې مشر عبدالجبار صافی وايي ، چې د ټاکنو خپلواک کمېسيون بايد د کورنيو مطبعو او چاپ ځايونو په کار ډاډ من اوسي او خپل ټول توکي په افغانستان کې چاپ کړي.
صافي پژواک ته وويل ، چې افغان مطبعې د چاپ پر عصري ماشينونو سمبالې دي، چې ان د ګاونډيو هېوادونو په پرتله، پرمختللې دي.
ده زياته کړه:”موږ ټولو ته اطمينان ورکوو، بايد يوڅه امتيازات داخلي کمپنيو ته قايل شي، چې هم پيسې زموږ فرار ونه کړي، او له بلې خواخلکو ته د کاريابۍ ذريعه هم وګرځي. دلته په هر لېول، په هر کيفيت، په هر ډيزاين چې وغواړي، پاڼې ورته چاپېدلاى شي.”
ده وويل ، افغاني مطبعې چمتو دي ، چې د راى پاڼو محفوظ ساتلو ضمانت ورکړي.
تېره مياشت په افغانستان کې د پانګې اچونې ملاتړې ادارې “آيسا” له کانديدانو غوښتي و، چې خپلې تبليغاتي پاڼې د هېواد په مطبعو کې چاپ کړي.
د ايسا مشر وفي الله افتخار ويلي و، چې په هېواد کې دننه د چاپ امکانات ډېر دي او کانديدان بايدد هېواد اقتصادي ودې ته په پام سره پرېکړه وکړي.
په تېرو ټاکنو کې د کانديدانو تبليغاتي پاڼې په بهرنيو هېوادونو په تېره بيا پاکستان کې چاپ شوې وې.
د ايسا چارواکو ويلي و، چې پر دې تبليغاتي پاڼو څه باندې شل ميليونه ډالره لګېږي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن