کلات ( پژواک ٢٦ ليندۍ ٩٢): آيساف وايي ،چې د يوې الوتکې د رالوېدو له امله يې نن د افغانستان په سوېل کې شپږ سرتېري وژل شوي دي .
په افغانستان کې د مېشتو ايساف ځواکونو مطبوعاتي دفتر وايي، د پېښې څېړنې يې پيل کړي، خو لومړنۍ څېړنې ښيي، چې په پېښه کې وسله وال مخالفین لاس نه لري.
د زابل ولایت د شاه جوی ولسوال ملک على محمد پژواک خبري اژانس ته وویل، چې دغه پېښه نن له غرمې وروسته د یادې ولسوالۍ د ابراهیم خیلو په سیمه کې رامنځته شوه.
هغه زیاتوی ، چې د پېښي د پلټنې لپاره افغان او بهرني ځواکونه سیمې ته رسېدلي، تر څو په دې اړه څېړنې وکړي.
ولسوال وايي ، چې د الوتکې د نوعيت ، د پېښي د رامنځته کیدو د لامل او پکې د ممکنه مرګ ژوبلې په اړه تر دې دمه معلومات نه لري.
خو وسله وال طالبان وايي ، چې په شاه جوى کې يې د بهرنیو ځواکونو چورلکه ويشتلې او راغورځولې ده.
طالب وياند قاري یوسف احمدي وايي،چې چورلکه سوځېدلې او په کې سپاره ټول بهرني سرتېري وژل شوي دي .
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن