کابل، جلال اباد ( پژواک ٣ مرغومى ٩٢ ) : د ملي امنيت لوى رياست وايي ، چې د ننګرهار ولايت پر مشرتابه يې د ځانمرګي بريد هڅه شنډه کړې ده.
په کابل کې د ملي امنيت لوى رياست د مرغومي په ٣مه، پژواک خبري اژانس ته په يوه رالېږل شوې خبرپاڼه کې ويلي ، چې دغه څلور کسيزه ډله يې له يوې اندازې چاودېدونکو توکو سره نيولې ده.
سرچينې زياته کړې ، دغې ډلې په ډېره ماهرانه توګه چاودېدونکي توکي له هېواد څخه بهرد کمپيوټرنو، موبايلونو او تخنيکي وسايلو په منځ کې ځای پر ځای کړي وو او غوښتل يې د ننګرهار ولايت پر مشرتابه ترهګريز بريد ترسره کړي.
د ملي امنيت لوى رياست ويلي، چې دغه ډله خپلې موخې ته له رسېدو د مخه د ملي امنيت د منسوبينو له خوا تر پېژندنې وروسته لاس په لاس له چاودېدونکو توکو او وسايلو سره يو ځای ونيول شوه.
په خبرپاڼه کې راغلي ، چې نيول شوي کسان عرفان، نقيب الله ،ګل محمد او فقيرالله نومېږي، چې د ننګرهار ولاېت اوسېدونکي دي.
سرچينه کاږي، دغو کسانو د لومړنيو څېړنو پرمهال اعتراف کړی، چې د تخنيکي وسايلو پرمختللې زده کړې يې له پولې اخوا ترسره کړې دي، ياد توکي او وسايل يې د قاري سليمان په نوم د طالبانو د يوتن قوماندان په لارښوونه ننګرهار ته د ترهګريز بريد په موخه رالېږدولي وو.
د ملي امنيت اداره وايي، چې په دې اړه يې نورې څېړنې پيل کړې دي.
د ننګرهار د والي وياند احمد ضياعبدالزى د يادې نيونې په اړه ناخبري ښيي او زياتوي، چې تر دا مهاله ورته د کومې امنيتي ادارې له لوري د ځانمرګو بريدکوونکو په اړه معلومات نه دي ورکړل شوي.
وسله والو طالبانو تر اوسه په دې اړه څه نه دي ويلي.
د يوه بل خبر له مخې ، د لغمان ولايت په چاڼيزو عملياتو کې څلورو وسله والو ته مرګ ژوبله اوښتې او دوه شکمن کسان نيول شوي دي.
د لغمان د والي وياند سرحدي ځواک پژواک اژانس ته وويل، چې له تېرو دوو ورځو راهيسې د لغمان د الينګار ولسوالۍ د سنګره درې په استقامت د ذوالفقار ١٦ په نوم د ګډو افغان ځواکونو چاڼيز عمليات پيل شوي وو ، چې نن پاى ته ورسېدل.
دى وايي ، چې په دغو عملياتو کې د وسله والو مخالفينو سره نښته هم رامنځته شوې ، چې په پايله کې يې د زرقاوي د ډلې دوه تنه وژل شوي او دوه نور يې شديد ټپيان شوي دي.
ده وويل: (( په عملياتو کې د وسله والو د وسلو څلور مهم زېرمه ځايونه هم له منځه تللي دي.))
نوموړى زياتوي، چې په عملياتو کې يې د شېخ صېب اړوند د تورۍ کلا،اعظم کلا، کوټاخېل، سباخېل ، شور اباد، چهار قلا، ميا خېل ، الاجيګر او نورو کليو د تصفيې او تلاشۍ تر څنګ د مخالفينو سره د تړاو په تور دوه تنه شکمن هم د افغان ځواکونو له لوري نيول شوي.
د والي د وياند په خبره ، چې د لارې په اوږدو کې افغان ګډو ځواکونو هغه ۱۱ کړۍ د وسايطو ضد ماينونه چې د مخالفينو له لوري ځای پر ځای شوي وو کشف او شنډ کړي دي.
نوموړى په عملياتو کې ګډو ځواکونو ته مرګ ژوبله نه مني.
خو بلخوا د وسله والو طالبانووياند ذبيح الله مجاهد په ياده نښته کې خپلې خواته مرګ ژوبله مني او زياتوي چې کورنيو او بهرنيو ځواکونو ته يې درنه مرګ ژوبله اړولې ده.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن