جلال اباد (پژواک ٤ مرغومى ٩٢): په جلال اباد ښار کې د ساختماني توکو يو شمېر سوداګرو او موټر چلوونکو د يوه لاريون په ترڅ کې شکايت وکړ، چې په بېلابېلو لارو کې ترې غير قانوني پيسې اخيستل کېږي.
يادو لسګونو لاريون کوونکو د مرغومي په ٤مه د بهسودو پله تر څنګ د
يوه لاريون په ترڅ کې د کونړ لاره وتړله او د غير قانوني پيسو له ورکړې يې سر ټکاوه.
د ډمټرک هينو د اتحاديي رييس ملک حسيب پژواک خبري اژانس ته وويل، چې د جلال اباد ښار په څلورو دروازو کې ترې د معدني توکو په نوم پيسې اخيستل کېږي.
هغه زياته کړه: ((د کامې له پله چې راتېرېږو، هلته موږ ته د معدن په نوم پارچه راکوي او پيسې راڅخه اخلي.))
د نوموړي په وينا، د بهسودو پله، سراچې پله، سره رود په سيمه او يو شمېر نورو ځايونو کې هم د معدني توکو په نوم ترې پيسې اخيستل کېږي.
ده وويل: ((دا خلک په معدن پورې تړلي دي، موږ بايد ترانسپورت ته پيسې ورکړو، مګر موږ نه د معدن په نوم هسې بې ځايه پيسې اخيستل کېږي.))
ملک حسيب وايي، چې يو شمېر شرکتونو دغه لارۍ ټېکه کړې او له لاريو پيسې اخلي.
نوموړى دا هم وايي، چې د سړک پر غاړو د شرکت وسله وال کسان ولاړ دي او هر ډريور که پيسې ورته ورنه کړي نو وهي يې.
د حکمت په نوم يوه موټر چلوونکي پژواک ته وويل، چې پخوا به يې يواځې د ښاروالۍ ٢٥ افغانۍ ټيکس ورکاوه، خو اوس يو شمېر شرکتونو ټېکې اخيستې دي، د ښاروالۍ ٥٠ افغانۍ او ٢٠٠ کلدارې نورې ترې اخلي.
ده وويل: ((يو ځل راپسې د ګل کريم ټيکه دار په نوم يو کس راغى او دوه ځلې يې ډزې هم راباندې وکړې او پيسې يې واخيستې.))
حکمت وايي، چې هر معدن ته بېلې پيسې ورکوي، خو ټېکه دار يې تنګوي او په زوره ترې پيسې اخلي.
د ظهيرالله په نوم بل موټر چلوونکى هم ورته خبره کوي او وايي چې څو زورواکي ترې په زوره پيسې اخلي او دولت هم ورته څه نه وايي.
ده وويل: ((که چېرې قانوني وي نو بيا يې ولې افغانۍ رانه نه اخيستې چې دوى کلدارې اخلي.))
خو د ننګرهار د والي وياند احمدضياء عبدالزي پژواک اژانس ته وويل، چې ولايتي ادارې ياده موضوع څېړلې ده.
هغه زياته کړه، چې د کانونو وزارت د پاليسۍ له مخې له ټولو کانونو د عوايدو د تر لاسه کېدو لپاره خصوصي سکتور ته قراردادونه ورکړل شوي دي.
نوموړى وايي: ((له کانونو چې تعميراتي مواد راځي، له تېږې نه متر مکعب ٣٥ افغانۍ او له شګې او نورو څخه متر مکعب ٤٥ افغانۍ اخيستل کېږي.))
عبدالزى وايي، که چېرې له يادو پيسو په کوم ځاى کې ډېرې پيسې اخيستل کېږي دا غير قانوني دي او د دا ډول کړنو کوونکي مجرمين دي.
د هغه په وينا، په ټولو بنادرو کې د يادو موادو له انتقالوونکو پيسې اخيستل کېږي چې دا قانوني دي.
Visits: 3
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن