دوهم تعقيب: لښکرګاه (پژواک ١٩ مرغومى ٩٢): د هلمند چارواکي وايي چې د دې ولايت په مرکز لښکرګاه کې د پوليسو پر حوزې د ډله ييز ځانمرګي بريد له امله درې ځانمرګي بريدکوونکي او يو پوليس وژل شوي دي.
د هلمند د امنيه قوماندانۍ د مطبوعاتي دفتر مسوول سمونوال عبدالاحد چوپان، پژواک خبري اژانس ته وويل، چې د مرغومي په ١٩مه د ماخوستن په شاوخوا اووه بجو د لښکرګاه د پوليسو پر لومړۍ حوزې درېيو ځانمرګو بريدکوونکو بريد کړى دى.
ده زياته کړه، يوه ځانمرګي د حوزې دروازې مخې ته د موټر بم چاودنه کړې او وژل شوى دى.
د هغه په وينا، دوهم بريد کوونکى د پوليسو په ډزو وژل شوى او درېيم په حوزې کې دننه خپل ځان ته چاودنه ورکړې ده.
نوموړى وايي، په دې پېښه کې پوليسو ته هم مرګ ژوبله اوښتې ده، خو په اړه يې کره معلومات نه لري.
خو د لښکرګاه د ايمرجنسي روغتون يوه ډاکټر د نوم نه ښودو په شرط، پژواک اژانس ته وويل چې تردې مهاله، دوى ته د يوه پوليس جسد او پنځه ټپي پوليس ور وړل شوي دي.
د امنيه قوماندانۍ د مطبوعاتي دفتر مسوول زياتوي، اوسمهال وضعيت نورمال دى او ډزې بندې شوې دي.
له دې مخکې د هلمند د والي وياند عمر ځواک، پژواک ته ويلي و چې له دې بريد سره هم مهاله له يوه سوداګريز مارکېټ څخه د پوليسو پر حوزې ډزې کېږي.
وسله والو مخالفينو په دې اړه تراوسه څه نه دي ويلي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن