کابل (پژواک،١٨سلواغه٩٢): ولسمشر حامد کرزى د ژمني المپيک لوبو د پيل په مراسمو کې د ګډون په موخه د روسيې سوچي ښار ته ولاړ.
يادې لوبې نن (سلواغې ١٨مه) په دغه ښار کې ترسره کېږي او دکب تر څلورمې پورې دوام کوي. دا لومړى ځل دى، چې روسيه ددې لوبو کوربه ده.
د ولسمشرۍ ماڼۍ د مطبوعاتي دفتر له خوا په خپره شوې خبرپاڼه کې ويل شوي ، چې ولسمشر حامد کرزى د خپل روسي سيال ولادمیر پوتین په رسمي بلنه د يوه لوړپوړي پلاوي په مشرۍ، نن سهار د روسيې پر لور وخوځېد.
خبرپاڼه ليکي، چې ولسمشر کرزى به د لوبو د پيل په مراسمو کې د ګډون ترڅنګ له پوتین، د ملګرو ملتونو له سرمنشي بانکي مون او د چين له ولسمشر، شي جين پېنګ سره هم وګوري.
په دغه سفر کې له نوموړي سره، د بهرنيو چارو وزير ضرار احمد عثماني او د ملي امنيت سلاکار ډاکټر رنګين دادفر سپنتا هم ملګري دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن