کابل (پژواک ٢٠ سلواغه ٩٢): د کابل لومړۍ محکمې، حبيب استالف چې په وژنو، تښتونو او وسله والو غلاوو کې په لاس لرلو تورن دى، د لويې څارنوالۍ په غوښتنه په اعدام محکوم کړ.
د لويې څارنوالۍ يوه چارواکي، چې د نوم له اخيستو يې ډډه کوله پژواک خبري اژانس ته وويل،چې د کابل ولايت د لومړۍ محکمې قضايي پلاوي د دغه کس په اړه خپل حکم نن ( د سلواغې ٢٠ مه) اعلان کړى دى.
د هغه په وينا، څارنوالۍ تېره مياشت د حبيب استالف دوسيه چمتو کړې وه او محکمې ته يې وسپارله او د شته شواهدو له مخې، د دغه تورن کس لپاره پکې د اعدام غوښتنه شوې وه.
د لويې څارنوالۍ دغه چارواکي زياته کړه، چې لومړۍ محکمې هم د شته شواهدو له مخې، ياد کس په ډېرو وژنو، غلاوو او تښتونو کې د لاس لرلو په پايله کې پر اعدام محکوم کړ.
لويې څارنوالۍ له دې وړاندې ويلي و، چې ټول تر لاسه شوي شواهد څرګندوي، چې حبيب استالف په هېواد کې د ننه او بهر له ډېرو مافيايي ډلو سره اړيکه درلوده او نوموړي هم د څېړنو پر مهال په دا ډول اړيکو درلودو، اعتراف کړى دى.
د کابل امنيه قوماندان پاسوال محمدظاهر د څرګندونو له مخې، حبيب استالف په هېواد کې د مافيا له مهمو غړو څخه دى، چې لس کاله وړاندې د پلچرخي له زندان څخه تښتېدلى و او پوليسو يې له هماغه مهال راهيسې د نيولو هڅه کوله.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن