کابل (پژواک ٢٣ سلواغه ٩٢): نن د کابل ښار په پلچرخي سيمه کې لسګونو تنو د پوليسو له لوري د يوه ملکي وګړي د وژل کېدو په اعتراض کې په لاريون لاس پورې کړ.
د کابل ښار د دوولسمې امنيتي حوزې امر سمونوال اکبر علي پژواک خبري اژانس ته وويل، نن سهار د پلچرخي سيمې لسګونو اوسېدونکو، چې له ځان سره يې يو مړى هم لېږداوه د پلچرخي زندان د دروازې مخې ته پر لاريون لاس پورې کړ.
هغه وويل، لاريون کوونکي له ځان سره کومه وسله نه لري او زياته يې کړه، چې د تاوتريخوالي د مخنيوي لپاره يې ټينګ تدابير نيولي دي.
خو د سيمې يوه اوسېدونکي شهاب الدين تره خېل پژواک ته وويل، چې نن سهار پوليسو يو تن د پلچرخي زندان د ننوتو د دروازې مخې ته پر ډزو سره وواژه.
تره خېل زياته کړه، چې له دې پېښې وروسته د دې سيمې شاوخوا دوو سوو اوسېدونکو د دغه ملکي وګړي د وژل کېدو په اعتراض کې په لاريون لاس پورې کړ او له حکومته غواړي، چې د دې پېښې عاملينو ته جزا ورکړي.
پژواک اژانس له ډېرو هڅو سره سره د پلچرخي زندان د چارواکو په نظر اخيستو بريالى نه شو.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن