لښکرګاه(پژواک،٨کب٩٢):وسله والو طالبانو په هلمند کې ددغه ولايت د امنيه قوماندانۍ يو استخباراتي مامور پر ډزو سره وواژه او يو بل يې ټپي کړ.
د ياد ولايت د امنيه قوماندانۍ د مطبوعاتو امر سمونوال عبدالاحد چوپان د کب په ٨مه پژواک خبري اژانس ته وويل، دغه پېښه تېره ماښام ناوخته رامنځ ته شوې ده.
چوپان وايي، وژل شوى استخباراتي مامور حميد الله نومېده، چې د لښکرګاه ښار، ښاروالۍ ته څېرمه پرې بريد شوى دى.
هغه وايي، په ياده پېښه کې ټپي شوى تن هم د امنيه قوماندانۍ کارکوونکى دى.
وسله والو طالبانو ددغه پېښې مسووليت پر غاړه اخيستى او ويلي يې دي، چې د هلمند د امنيه قوماندانۍ دوه استخباراتي مامورين يې پر ډزو سره وژلي دي.
په دې وروستيو کې په هملند کې د وسله والو طالبانو او ناپېژاندو جنګياليو له لوري دغسې غلچکي بريدونه زيات شوي دي.
د هلمند د امنيه قوماندانۍد مطبوعاتو امر وايي، ځايي پوليسو ددغو پېښو د مخنيوي لپاره هڅه زياتې کړې دي.
عبدالاحد چوپان وايي:(( تېره ورځ د حميد په نامه يو وسله وال طالب، چې د يوه پوليس د په نښه کولو هوډ يې درلود ونيول شو ، له هغه سره يوه تومانچه هم نيول شوې او څېړنې ترې روانې دي.))
دا په داسې حال کې ده ، چې په روانه اوونۍ کې په دغه ولايت کې دوه داسې پېښې وشوې، چې په کې دوه ملکي وګړي د ناپېژانده وسله والو له لوري ووژل شول.
په دغو وژل شويو کې يو تن يې د هلمند د کارګرو ټولنې مشر و.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن