کابل (پژواک ٢٦ کب ٩٢): د ولسي جرګې د دويم مرستيال او منشي د څوکيو کانديدانو نن هم ونه شو کړاى، چې د برياليتوب لپاره اړينې رايې ترلاسه کړي.
تېره ورځ صالح محمد سلجوقي د ولسي جرګې د دويم مرستيال او عرفان الله عرفان د دې جرګې د نايب منشي په توګه وټاکل شول، خو د لومړي مرستيال او منشي د څوکيو لپاره کانديدانو اړينې رايې ترلاسه نه کړې.
نن د ولسي جرګې د لومړي مرستيال د څوکۍ لپاره په دې جرګه کې د پکتيا استازي ګل بادشاه مجيدي، د ميدان وردګو استازي غلام حسين ناصري او د بادغيس استازي غلام سرور فايز ځانونه کانديد کړي وو.
دغه راز د منشي د څوکۍ لپاره د بدخشان استازي عبدالرووف انعامي، د پروان استازې ذکيې سنګين او د هرات استازې سمين بارکزۍ ځانونه کانديد کړي وو.
يادو کسانو په لومړي دور ټاکنو کې اړينې رايه ترلاسه نه کړې او دويم ځل د لومړي مرستيال د څوکۍ لپاره د ګل بادشاه مجيدي او غلام حسين ناصري او د منشي د څوکۍ لپاره د ذکيې سنګين او عبدالرووف انعامي تر منځ سيالۍ وشوې، ځکه چې دغو کسانو ډېرې رايې لرلې.
د ولسي جرګې د نننۍ غونډې په دويم پړاو ټاکنو کې ١٦٥ کسانو برخه لرله او هر کانديد بايد د برياليتوب لپاره ٨٣ موافقې رايې ترلاسه کړې واى.
خو په دويم پړاو ټاکنو کې د لومړي مرستيال د څوکۍ لپاره کانديد ګل بادشاه مجيدي ٦٢ او غلام حسين ناصري ٣١ موافقې رايې ترلاسه کړې او د يادې څوکۍ په ترلاسه کولو بريالي نه شول.
دغه راز د منشي د څوکۍ لپاره هم په دويم پړاو ټاکنو کې عبدالرووف انعامي ٧٠ او ذکيې سنګين ٣١ رايې ترلاسه کړې او دوى هم بريالي نه شول.
د ولسي جرګې رييس عبدالرووف ابراهيمي وويل، چې د يادو څوکيو لپاره به درېيم پړاو ټاکنې سبا ترسره شي.
په تېره يوه کلنه دوره کې ميرويس ياسيني د لومړي مرستيال، صالح محمد سلجوقي د دويم مرستيال، سيداکرام د منشي او عرفان الله عرفان د نايب منشي په توګه کار کاوه.
ملي شورا د هر کاري کال په پيل کې د دواړو جرګو لومړى او دويم مرستيال، منشي او مرستيال منشي د استازو د رايو پر بنسټ ټاکي.
دغه شورا د ژمي له يوې نيمې مياشتنۍ رخصتۍ وروسته، وړمه ورځ ولسمشر پرانيسته.
مشرانو جرګې وړمه ورځ پرېکړه وکړه، چې د ١٦مې دورې د درېيم کال اداري پلاوى دې پر خپل ځاى پاتې شي، ځکه چې د ولايتي شوراګانو تر ټاکنو وروسته د دې جرګې ٦٨ غړي بدلېږي.
دې جرګې پرېکړه کړې، چې رييس او اداري پلاوى او د کمېسيونونو غړي به د ولايتي شورا تر ټاکنو او دې جرګې ته د نوو انتخابي غړو تر معرفي کېدو وروسته وټاکل شي.
ټاکل شوې، چې د ولسمشرۍ او ولايتي شوراګانو ټاکنې د راتلونکي کال د وري په ١٦مه ترسره شي.
د مشرانو جرګې د پرېکړې له مخې، محمدعلم ايزديار به د لومړي مرستيال، حاجي رفېع الله ګل افغان به د دويم مرستيال، سيد فرخ شاه جناب به د منشي او سيد عزيزالله الفتي به د نايب منشي په توګه تر هغه کار کوي، چې د ولايتي شوراګانو د ټاکنو په پايله کې ٦٨ نوي ټاکل شوي کسان د دې جرګې غړيتوب ترلاسه کړي.
د اساسي قانون د ٨٤ مې مادې له مخې، د مشرانو جرګې ٣٤ غړي د ولسواليو له شوراګانو او ٣٤ تنه له ولايتي شوراګانو څخه ټاکل کېږي او ٣٤ تنه نور يې ولسمشر انتصابوي.
دغه مهال له دې امله، چې په افغانستان کې د ولسواليو د شوراګانو ټاکنې نه دې شوې، ٦٨ تنه د ولايتي شوراګانو له ټاکنو وروسته، له ولايتي شوراګانو څخه د مشرانو جرګې د غړيتوب لپاره ټاکل کېږي.
د اساسي قانون د ٨٧مې مادې له مخې، د ملي شورا له دواړو جرګو څخه هره يوه د كار د دورې په پيل كې له خپلو غړو څخه يو تن د يوې تقنينې دورې لپاره د رييس په توګه ټاکي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن