غزني ښار (پژواک ١٢ ورى ٩٣): امنيتي چارواکي وايي، چې د غزني په ګيلان ولسوالۍ کې د ځانمرګي واسکټونو د چمتو کولو پر مهال يوه واسکټ چاودنه کړې او ١٦ طالبان يې وژلي دي.
په کابل کې د ملي امنيت لوى رياست له خوا د وري په ١٢مه پژواک خبري اژانس ته په يوه رالېږل شوې خبرپاڼه کې راغلي، چې دا پېښه نن غرمه يوه بجه د غزني په ګيلان ولسوالۍ کې رامنځته شوې ده.
سرچينې زياته کړې، ځينو وسله والو، چې پاکستانيان هم په کې وو، غوښتل چې په غزني ښار کې د بريدونو د ترسره کولو لپاره ځانمرګي واسکټونه جوړ کړي، چې يو واسکټ پرې چاودېدلى دى.
د ملي امنيت ادارې ويلي، چې په دې چاودنه کې د يو شمېر قوماندانانو په ګډون ١٦ تنه وژل شوي او ٩ نور ټپيان دي.
سرچينه کاږي، دغو کسانو غوښتل، چې په ياد ولايت کې د ټاکنو پر مهال ګډوډي رامنځته کړي.
د غزني امنيه قوماندان زړور زاهد پژواک اژانس ته د پېښې د تاييد تر څنګ وويل، چې هغوى په سيمه کې د ځانمرګو بريدونو د ترسره کولو لپاره واسکټونه چمتو کول چې پرې چاودنه وشوه.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن