کابل(پژواک ٢٦ورى ٩٣): ولسمشر حامد کرزي په خوست کې د امریکایي ځواکونو هغه هوایي برید چې له امله یې د یوې ښځې په شمول درې تنه ملکي وګړي وژل شوي و، په کلکه غندلى دى.
دغه مطلب په هغه خبر پاڼه کې راغلى دى چې د وري په ٢٦مه له ارګ څخه پژواک خبري اژانس ته راستول شوې ده.
سرچينه وايي، د خوست د والي د دفتر د لومړنیو معلوماتو له مخې د امریکایي ځواکونو په هوایي برید کې چې تېره شپه د دغه ولایت د نادرشاه کوټ ولسوالۍ د میرګوړي په سیمه کې ترسره شو، یوه ښځه او د هغې دوه کوچني زامن وژل شوي او خاوند یې ټپي شوی دی.
سرچينه ليکي، چې ولسمشر حامد کرزي د غه برید د دواړو هېوادونو ترمنځ د شویو توافقاتو پرخلاف څرګنده سرغړونه وبللي ده او هغه یې په سختو ټکو کې يې محکوم کړى دى.
د سرچينې ترمخه، ولسمشر حامدکرزي د خوست له والي عبدالجبار نعیمي او د هېواد له امنیتي چارواکو سره ټيلیفوني خبرې وکړې او د دغه برید د څیړنې لپاره یې هغوی ته لازمې لارښوونې وکړې.
دغه رازولسمشر کرزي د وژل شويو کسانو کورنۍ ته د خپلې ژورې خواخوږۍ او ډاډ ګیرنې مراتب وړاندې کړل او ټپي ته يې د لوی خدای له دربار څخه د سملاسي روغتیا هیله وکړه.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن