کابل(پژواک، ٣ غويى ٩٣): د دولت د روان مالي کال د لومړۍ ربعې عوايد ٢٩ ميليارده افغانيو ته رسېدلي او د ټاکل شوې موخې پربنسټ بايد د روان مالي کال تر پايه دا شمېره ١٣٣ ميلياردو افغانيو ته ورسېږي.
د ماليې وزارت وياند عبدالقادر جيلاني، نن پژواک خبري اژانس ته وويل، چې د روان مالي کال د لومړۍ ربعې ترلاسه شوي عوايد جوتوي، چې سږ کال به خپلې ټاکل شوې موخې ته ورسېږي.
هغه وويل، د روان مالي کال د لومړۍ ربعې لپاره د هېواد د سياسي وضعيت او د وري مياشتې د ١٦مې نېټې د ولسمشرۍ او ولايتي شوراګانو ټاکنو ته په پام سره، ٢٩ ميليارده افغانۍ هدف ټاکل شوى و، چې ترلاسه شوى او تمه ده، چې د کال په پاى کې هم ټاکل شوې موخه ترلاسه شي.
د ماليې وزارت د اعلاميې له مخې، د دولت د عوايدو او لګښتونو حساب په ١٣٩٢ مالي کال کې د هېواد د مالي ادارې د سيستم شمېرو او بودجوي واحدونو له پلي کولو وروسته په رسمي ډول د پلټنې عالي ادارې ته سپارل شوى دى او دا اداره به د دولت د قطعيې له حساب وروسته ولسي جرګې ته راپور ورکړي.
سرچينې ليکلي، د افغان دولت کورني عوايد په ١٣٩٢ کال کې تر ١٠٩،٠٠ميليارده افغانيو پورې وو، چې د دولت د ټولو لګښتونو پر وړاندې (عادي او پراختيايي بوديجه) ٢٧٨،١٤٥ ميليارده افغانۍ دي. له دې حسابه کورنيو عوايدو په ١٣٩٢ کال کې د دولت د ټوليزو لګښتونو ٣٩ سلنه برخه پوره کړې ده.
په اعلاميه کې راغلي، چې وروستۍ کچه (د ضمايمو او د کال د منځ له ارزونې سره) د ١٣٩٢ کال عادي بوديجه 218,986 افغانيو ته لوړه شوې وه او د هغه کال ټوليز لګښتونه 197,992 ميليارده افغانۍ وو.
سرچينې زياته کړه، دا شمېرې څرګندوي، چې د بوديجوي واحدونو له خوا لس سلنه سپما شوې او په عادي بوديجه کې د سپما اندازه له ١٣٩١ کال څخه غوره ده.
د ماليې وزارت د معلوماتو له مخې، د ١٣٩٢ مالي کال پراختيايي بوديجه کابو ١٤٠،١٩٤ ميليارد افغانۍ او پراختيايي لګښتونه ٨٠،١٥٣ ميليارده افغانۍ دي، چې د پراختيايي بوديجې د ٥٧ سلنې پلي کېدو څرګندويه ده او د تحقق سلنه کابو د ١٣٩١ کال د پراختيايي بوديجې د تطبيق له سلنې سره ورته ده.
د خزانو عمومي رييس محمداقا کوهستاني د تفتيش عالي ادارې ګومارل شوي کمېسيون ته د قطعيې حساب د سپارلو پرمهال وويل: ((په ټولو ولايتونو کې د افغانستان د مالي ادارې د کمپيوټري سيسټم تعميم او د مرکزي ادارو مستقيم لاسرسى له يوې خوا د هېواد د مالي چارو اداره اسانه او ډاډمنوي او له بلې خوا په مالي ادارو کې د روڼتيا لوړېدل په هېواد کې د فساد کچه را ښکته کوي. د افغانستان د خزانو رياست له هغو څخه رضايت لري، چې د غوره حکومتوالۍ په برخه کې يې لوبولى دى.))
د قطعيې د حساب راپور، د عامه لګښتونو او مالي چارو ادارې د قانون له احکامو سره سم له بشپړو جزئياتو او کره شمېرو سره ولسي جرګې ته د تفتيش عالي ادارې تر راپور وړاندې کولو وروسته خپرېږي.
د ماليې وزارت د معلوماتو له مخې، څلور کاله وړاندې د هېواد د عوايدو کچه ٥٧ ميليارده افغانيو ته رسېده، خو له ماليې څخه د فرار په برخه کې د دې وزارت د هڅو په پايله کې کال پر کال زياته شوې ده.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن