تالقان (پژواک،٣ غويى ٩٣): د تخار امنيتي مسوولين وايي، چې د دې ولايت په مرکز تالقانو کې يو تن خپله مور د تومانچې په ډزو ټپي کړې او وروسته يې خپل ځان هم وژلى دى.
د دغه ولايت د امنيه قوماندانۍ وياند سمونيار عبدالخليل اسير د غويي په ٣مه، پژواک خبري اژانس ته وويل، چې دغه پېښه د دې ښار اړونده په اقمسجد سيمه کې د کورني تاوتريخوالي له امله رامنځ ته شوې ده.
ده زياته کړه، ۵۰ کلن امين الله د کورنيو تاوتريخوالي له امله، لومړى خپله مور ټپي کړې او وروسته يې په خپل ځان هم ډزې کړي.
د هغه په خبره، امين الله سم له واره وژل شوى او مور يې د دغه ولايت د جنايي جرمونو په وړاندې د مبارزې د پوليسو له لوري، ولايتي روغتوته لېږدول شوې ده.
دى زياتوي: ((د اقمسجد د کلي اوسېدونکي امين د ګل رحيم زوى، تېره شپه ۸ بجې خپله مور ټپي کړې؛ کله يې چې مور ټپي کېږي، خپله هم ځان وژني؛ له پېښې نه وروسته د جنايي جرمونو په وړاندې د مبارزې پوليس سيمې ته ورغلل او څېړنه يې وکړه؛ ټپي يې د تالقانو ولايتي روغتون ته لېږدولې ده.))
په تخار ولايتي روغتون کې د بي بي شمايلې معالج ډاکټر اسدالله پژواک ته وويل، د ناروغ روغتيايي حالت د ډاډ وړ دى.
دى وايي، يوه مرمۍ يې په اوږه او بله يې په نس لګېدلې ده.
دا په داسې حال کې ده، چې د دغه ولايت د ښځو چارو رياست د شمېرو له مخې، له تېر يو کال راهيسې د دغه ولايت ۱۷ ښځې د کورنيو تاوتريخوالو قرباني شوې دي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن