غزني (پژواک ٤ غويى ٩٣): چارواکي وايي، چې د غزني په اندړو ولسوالۍ کې د دوو پاکستانيانو په ګډون ٨ وسله وال وژل شوي، پنځه ټپيان دي او ٦ نور ژوندي نيول شوي دي.
په غزني کې د ۲۰۳ تندر قول اردو د درېيمې لوا وياند نظيف الله سلطاني د غويي په ٤مه پژواک خبري اژانس ته وويل، چې وسله والو ته دغه مرګ ژوبله تېره شپه د يادې ولسوالۍ په چهلتن سيمه کې د عملياتو پر مهال ور اوښتې ده.
سلطاني وايي، په وژل شوو کې يو طالب قوماندان هم شامل دى خو نوموړي يې د هويت په اړه څه ونه ويل.
هغه وويل، چې په دغو عملياتو کې افغان ځواکونو ته مرګ ژوبله نه ده اوښتې.
بلخوا د اندړو ولسوال محمدقاسم ديسي وال پژواک ته وويل، چې ياد عمليات تېره شپه ناوخته د ګډو ځواکونو له خوا ترسره شوي دي.
هغه تاييد کړه، چې په دغو عملياتو کې ١٣ وسله والو ته مرګ ژوبله اوښتې او ٦ نور ژوندي نيول شوي دي.
د نوموړي په وينا، چې په دغو عملياتو کې ملکي وګړو ته زيان نه دى اوښتى.
په ورته مهال د ملي دفاع وزارت هم د غوايي په ٤مه پژواک ته په رالېږلې خبر پاڼه کې ويلي، چې د توفان په نامه يې په ګډو عملياتو کې ١٣ تنه وسله والو طالبانو ته مرګ ژوبله اړولې ده.
طالب وياند ذبيح الله مجاهد رسنيو ته ويلي، چې د دوى ملګري په اندړو کې د سيمه ييزو پوليسو پر يوې پوستې تر بريد وروسته د باکو په سيمه کې د افغان ځواکونو له کمين سره مخ شوي دي.
د هغه په وينا، د کمين پر مهال په نښته کې يې يو شمېر سرتېري وژلي او څلور طالبان ټپيان شوي دي.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن