لښکرګاه (پژواک ۱۱ غويى ۹۳): د هلمند په مارجې ولسوالۍ کې په خپلمنځي جګړه کې دوه پوليس وژل شوي او يو ملکي وکړى ټپي شوى دى.
د هلمند د امنيه قوماندانۍ مطبوعاتي مسوول سمونوال عبدالاحمد چوپان د غويي په ۱۱مه پژواک خبري اژانس ته وويل ، تېره ورځ يو ملي پوليس د همدې ولسوالۍ په څلورلارې بازار کې ډزې کړي او يو ملکي وګړى يې ټپي کړى دى.
هغه زياته کړه ، چې تر ډزو وروسته دغه پوليس د تېښتې هڅه کوله، چې د بل سيمه ييز پوليس له خوا پرې ډزې شوې دي.
د نوموړي په وينا، د ډزو په تبادله کې دواړه پوليس وژل شوي دي.
چوپان وايي، چې دا يوه جنايي پېښه ده او پوليسو يې په اړه پلټنې پيل کړې دي.
د سيمې يوه اوسېدونکي حاجي ظاهر جان پژواک اژانس ته وويل ، چې ياد پوليس له دوکاندار څخه په زوره له پيسو پرته خوراکي توکي غوښتل.
د هغه په وينا، کله چې دوکاندار انکار وکړ، هغه پرې ډزې وکړې، يو تن يې وواژه او بل يې ټپي کړ.
حاجي ظاهر وايي، چې بريد کوونکي د ماموريت پر پوليسو هم ډزې کړې دي، خو کله چې يې تېښته کوله، د سيمه ييزو پوليسو له خوا پرې ډزې شوي او وژلى يې دى.
د دې ولسوالۍ د ټولنيزې شورا غړى اختر محمد وايي ، چې په دې نښته کې دوه پوليس او يو ملکي وګړى وژل شوي او يو ملکي وګړى ټپي دى.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن