بروکسل (پژواک ۱۳ غبرګولى ۹۳): د ناټو د دفاع وزيرانو په غونډه کې به په افغانستان کې د دغه سازمان د نوي ماموريت په اړه پلانونو ته وروستۍ بڼه ورکړي.
دغه څرګندونې د ناټو سازمان سرمنشي انډرس فوغ راسموسن د غبرګولي په ۱۳مه په بروکسل کې د ناټو د دفاع وزيرانو دوه ورځنۍ غونډې له پيلېدو مخکې د يوې ناستې پر مهال د پژواک خبري اژانس د يوې پوښتنې په ځواب کې وکړې.
هغه زياته کړه، چې سبانۍ غونډه د افغانستان لپاره ځانګړې شوې او په دې کې به د دفاع وزيران د ناټو د نوي او د ايساف پر ترسره کېدونکي ماموريت خبرې وکړي.
خو راسموسن وويل چې د ناټو نوى ماموريت هغه مهال پيلېداى شي چې لپاره يې قانوني چوکاټ ولري.
د نوموړي په وينا، د قانوني چوکاټ لپاره يې له افغان حکومت سره د (سوفه) تړون په اړه خبرې کړې او ډاډ يې څرګند کړ، چې خپل نوي ماموريت لپاره به قانوني چوکاټ ترلاسه کړي.
د ناټو سرمنشي وويل چې په څو مياشتو کې به د د دوى اوږد جګړه ييز ماموريت پاى ته ورسېږي او هڅه به وکړي، چې په دې موده کې ترلاسه شوې لاسته راوړنې وساتلى شي.
د غونډې دويمه ورځ د افغانستان لپاره ځانګړې شوې، چې په کې د افغانستان د ملي دفاع وزير جنرال بسم الله محمدي هم ګډون کوي.
دغه راز په دې غونډه کې په افغانستان کې د ايساف لوى قوماندان جنرال جوزيف ډنفورډ، د ناټو ملکي او د ملګرو ملتونو ځانګړي استازي هم ګډون کوي.
د افغانستان د ملي دفاع وزارت وياند جنرال ظاهر عظيمي وايي چې د ملي دفاع وزير به د افغان ملي ځواکونو د ستونزو، راپېښو ننګونو، د هوايي ځواک په برخه کې د شته ستونزو او په دې برخه کې د ناټو د غړو هېوادونو د همکاريو په اړه خبرې وکړي.
نوموړى وايي چې تر ۲۰۱۴ کال وروسته په افغانستان کې د پاتې کېدونکو امريکايي سرتېرو په اړه د ولسمشر بارک اوباما تر اعلان وروسته دا غونډه ځانګړى اهميت لري.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن