فيض اباد(پژواک، ٢٠ غبرګولى ٩٣): د بدخشان ولايت په راغستان ولسوالۍ کې به د نوي اداري مرکز په جوړېدو سره ددغې ولسوالۍ ټولو ٤٧ زره اوسېدونکو ته د ټولنيزو خدمتونو په وړاندې کولو کې ښه والى راشي.
د راغستان ولسوال وايي، چې ددغه مرکز په جوړېدلو سره به دولتي کارکوونکي په يوه غوره موقعيت کې د خلکو لپاره په ټولنيزو، فرهنګي او اقتصادي برخو کې غوره خدمات وړاندې او د خلکو او ځايي ادارې ترمنځ به اړيکې پياوړې کړي.
په کابل کې د المان د پراختيايي همکاريو دفتر (GIZ) د عامه اړيکو څانګې له خوا نن پژواک خبري اژانس ته په يوه را استول شوې خبرپاڼه کې راغلي، چې دغه نوى مرکز د المان په مرسته د ٣٣ ميليونه افغانيو په لګښت جوړېږي.
د سرچينې په خبره، دا دوه پوړيزه اداري ودانۍ به د ولسوال کارځاى، د دولت کليدي ادارو لکه پوهنې، مالي اداره، کرنه، سيمه ييزه حقوقي محکمه، د کليو پراختيا اداره، ښاروالي، د ثبت عمومي اداره، د څارنوالۍ حقونو او اړيکو ادارې څخه جوړه وي.
په کابل کې د المان د (GIZ) دفتر وايي، چې ددغه مرکز په جوړېدو سره به د پوهنې، مالي چارو، کرنې او عدليې په برخو کې ٥٠ دولتي کارکوونکو ته کارځايونه رامنځته شي.
ددغه مرکز په جوړېدو سره به د راغستان ولسوالۍ ٤٧ زره اوسېدونکو ته د ټولنيزو خدمتونو د وړاندې کولو چارو کې سمون راشي.
دا ودانۍ د بدخشان ولايت د ولايتي پراختيايي کمېټې (PDC)د پرېکړې او د المان د همکاريو او پراختيا وزارت (BMZ)په مالي مرسته جوړېږي او د پروژې بشپړوالى د غوره حکومتوالۍ ، د خدماتو وړاندې کولو د ښه والي او سيمه ييزې ادارې له پياوړتيا او مشروعيت سره مرسته کوي.
د راغستان ولسوالي د بدخشان د مرکز فيض اباد ښار په ١٤٠ کيلومترۍ کې موقعيت لري.
د يادونې ده، چې تېره اونۍ د بدخشان په مرکز فيض اباد کې د روغتيايي اوبو رسولو د يوې پروژې کار د بدخشان په مرکز فيض اباد کې د المان په ١٧ ميليون يورو مرستې سره پيل شو او ټاکل شوې، چې دوه کاله وروسته به څلور زره کورنۍ په خپلو کورونو کې پاکواوبو ته لاسرسى ولري.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن