واشنګټن (پژواک ٤ زمرى ٩٣): د امريکا ولسمشر بارک اوباما يو ځل بيا د افغانستان د ولسمشرۍ له دواړو کانديدانو ډاکټر اشرف غني او ډاکټر عبدالله سره خبرې کړې دي.
د سپينې ماڼۍ وياند جوش ارنيسټ په واشنګټن کې خبريالانو ته وويل چې ولسمشر بارک اوباما پرون د جمعې په ورځ له دواړو افغان کانديدانو سره په ټيلېفون کې خبرې کړې دي.
هغه زياته کړه، چې د دغو اړيکو پر مهال دريو واړو مشرانو د ولسمشرۍ ټاکنو د دويم پړاو د رايو د بياشمېرنې او څېړنې پر پروسې خبرې وکړې.
نوموړى وايي چې ولسمشر بارک اوباما له دواړو افغان کانديدانو مننه وکړه چې د ټاکنيزو لانجو د هواري لپاره د ملي يووالي حکومت او د رايو د بياڅېړنې په اړه پرېکړې ته سره ورسېدل.
بارک اوباما له دواړو کانديدانو وغوښتل چې د ملي ګټو لپاره په ګډه د يوه حکومت په جوړولو کار وکړي.
هغه دغه راز راز دواړو کانديدانو ته په ډاګه کړه، چې د ټاکنيزو لانجو د هواري لپاره پر شوو پرېکړو عمل وکړي او د عملي کولو لپاره يې خبرو او مذاکرې ته ادامه ورکړي، څو افغان ولس د ټاکنو پر پروسې باور وکړي.
اوباما يو ځل بيا په ډاګه کړه، د دې لپاره هېڅ توجيه نشته، چې د ټاکنيزو شخړو پر مهال دې د اساسي قانون پر ضد ګامونه پورته کړى شي.
هغه له دواړو کانديدانو وغوښتل چې په ډيموکراتيکه توګه دې په افغانستان کې د واک د لېږد پروسه په برياليتوب ترسره کړي.
د يادونې ده، د افغانستان د ولسمشرۍ د دويم پړاو ټاکنو لانجه د امريکا د بهرنيو چارو د وزير جان کيري په منځګړيټوب په دې هواره شوه چې د ملي يووالي حکومت د جوړېدو تر څنګ به د ټولو رايو بيا څېړنه کېږي.
له تېرې اونۍ راهيسې دا پروسه پيل شوې ده، خو په دې منځ کې دوه ځلې د رايو بيا څېړنه د دواړو کانديدانو د ټيمونو تر منځ د اختلافاتو له امله ودرېده خو بېرته پيل شوه.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن