کندهار (پژواک ٢٠ زمرى ٩٣): د کندهار ښاروالي د دغه ولايت په ارغنداب ولسوالۍ کې د ښځو لپاره ځانګړى پارک جوړوي.
د کندهار د ښاروالۍ وياند زمري څرګند د زمري په ٢٠مه پژواک خبري اژانس ته وويل، دغه پارک د يادې ولسوالۍ بابا ولي کوتل ته څېرمه پر ٥٠ جريبه ځمکه کې جوړېږي.
هغه زياته کړه، د پارک جوړېدو چارې پيل شوې او تر راتلونکو دريو مياشتو پورې به بشپړې شي.
د نوموړي په وينا، په دغه پارک کې ټولې اسانتياوې لکه د احاطې دېوال، د موټرو تمځاى، ګلدانونه، تشنابونه، کانټين او نور په پام کې نيول شوې دي.
دى وايي، د پارک پر جوړېدو ١٣ ميليونه افغانۍ لګښت راځي چې د کندهار ښاروالۍ له بوديجې ورکول کېږي.
څرګند وويل، په دې توګه کندهار ښاروالي هڅه کوي چې د نورو برخو تر څنګ د ښځو لپاره هم اسانتياوې او د تفريح امکانات برابر کړي.
د کندهار ښار مېرمنې وايي، چې په دغه ولايت کې له لويه سره د ښځو لپاره تفريح ځايونه کم او يا هم له ښاره لرې دي، چې کورنۍ په ډاډه زړه نه شي ورتلاى.
د کندهار ښار د کابل شاه سيمې اوسېدونکې رحمانيه وايي، د ښاروالۍ له لوري د ځانګړي ښځينه پارک جوړېدل مېرمنو ته د خدماتو او اسانتياوو د برابرولو په برخه کې يو ښه ګام دى.
هغې پژواک اژانس ته وويل، د نارينه وو په څېر ښځې هم حق لري، چې د کورنيو د نورو غړيو سره يو ځاى تفريح وکړي.
نوموړي د کندهار له ښاروالۍ وغوښتل چې د پارک تر جوړېدو وروسته يې نظم او ساتنې ته هم پاملرنه وکړي.
څو مياشتې وړاندې د کندهار ښار لوېديځ پلو د چهل زينو په تاريخي سيمه کې هم د ښاروالۍ له خوا يو تفريحي پارک تر جوړېدو وروسته د خلکو پر مخ پرانيستل شو.
د دغه پارک لومړۍ برخه په اته جريبه ځمکه کې د ٤٣ ميليونه افغانيو په لګښت جوړه شوې خو د پارک د څلورو نورو برخو کار لا پاتې دى، چې ټولټال ٤ ميليونه امريکايي ډالر لګښت ورباندې راځي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن