ميدانښار ( پژواک ٨ وږى ٩٣): د ميدان وردګو ولايت په ځينو سيمو کې د امنيتي پېښو پر مهال ٢٧ کسانو ته مرګ ژوبله اوښتې ده.
د دغه ولايت د والي وياند عطاء الله خوږياڼي د وږي په ٨ مه، پژواک اژانس ته وويل چې يادې پېښې په تېرو ٤٨ ساعتونو کې د ولايت په مرکز ميدانښار، سيداباد، چک او نرخ ولسواليو کې رامنځته شوې دي.
هغه زياته کړه، چې د نرخ ولسوالۍ په ابراهيم خېلو او په شاه کابل سيمو کې د ځمکنيو او هوايي عملياتو پر مهال د وزيرستانيانو په ګډون ١٣ وسله وال وژل شوي او دوه نور ژوندي نيول شوي دي.
د نوموړي په وينا، دغه راز د سيداباد ولسوالۍ په بهادرخېلو، تنګي او سالارو سيمو کې د
بېلابېلو عملياتو په ترڅ کې ۵ مخالفين وژل شوي او ۵ نور ټپيان دي.
خوږياڼي وويل چې په ورته وخت کې د مرکز ميدان ښار په لعلوخېلو سيمه کې د هوايي بريد په
ترڅ کې يو وسله وال مخالف وژل شوی او يو بل ټپي دی
د والي وياند وايي چې د چک ولسوالۍ په ګودي سيمه کې د وسلوالو مخالفينو لخوا په يوه توغول شوې مرمۍ کې يو ٩ کلن ماشوم وژل شوى دى.
دى وايي چې ديادې ولسوالۍ په بمبايي سيمه کې دامنيتي ځواکونو او وسلوالو مخالفينو ترمنځ نښته کې يو ملکي وګړى وژل شوى دى.
وسله والو مخالفينو تر اوسه د يادو پېښو په اړه څه نه دي ويلي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن