کلات ( پژواک، ٢٩ وږى ٩٣ ) : د زابل والي وايي چې دامنيتي ستونزو له امله ددې ولايت په يو شمېر ولسواليو کې قضايي ادارې فعاليت نه لري.
د زابل والي محمد اشرف ناصري دغه څرګندونې د وږي په ٢٩مه، دې ولايت لپاره د استېناف څارنوالۍ د نوي رييس د معرفۍ په مراسمو کې وکړې.
هغه په دې مراسمو کې د پخواني رييس عبدالغفار افضلي فعاليتونه او هڅې وستايلې او له نوي رييس څخه د ښو فعاليتونو غوښتنه وکړه.
ناصري زياته کړه چې د امنيتي ستونزو له امله ددې ولايت په يو شمېر ولسواليو کې قضايي ادارې فعاليت نه لري .
خو هغه وويل چې دوى به هڅه وکړي، چې په دې سيمو کې ژر تر ژره قضايي ادارې فعالې کړي.
د زابل والي وايي چې د ولايت د مقام په ګډون به ټولې ادارې له عدلي او قضايي ارګانونو سره مرسته او همکاري تر څو په ټولو باندې قانون يو شان تطبيق شي .
د زابل د استېناف محکمې نوي رييس محبوب الهي د ټولو دولتي ادارو پر همغږۍ ټينګار وکړ او زياته يې کړه، چې په دې برخه کې همغږي اړينه ده.
هغه پر قومي مشرانو غږ و، تر څو د ټولنې داصلاح او د فعاليتونو د ښه پرمختګ په موخه له دولت سره خپله همکاري زياته کړي.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن